Metamorfoza 2/ GJKKO dënon me 66 vite Dedan Gjonin dhe 5 të tjerët

GJKKO ka dhënë 66 vite burg për të përfshirët e dosjes “Metamorfoza 2”. Ish-shefi i Krimeve Dedan Gjoni, dhe 5 të tjerët Ismail Zeneli, Bujar Ajeti (Gremizi), Adrian Cenaj (Dedja), Besmir Murati dhe Albert Prenga, janë shpallur fajtorë për sigurim kushtesh në tentativën për të vrarë dy vëllezërit Edmond dhe Albert Nela, trafik droge, grup të strukturuar kriminal, si dhe armëmbajtje pa leje.

Më konkretisht, ish-shefi i Krimeve, Dedan Gjoni është dënuar me 12 vite burg për veprat penale për sigurim kushtesh për vrasje, grup i strukturuar kriminal, trafik narkotikësh dhe shpërdorim detyre. Nga gjykimi i shkurtuar, ulet në 8 vite burg.

Ismail Zeneli është dënuar me 15 vite burgim për veprat penale sigurim kushtesh për vrasje, grup të strukturuar kriminal dhe trafik droge. Në aplikim të gjykimit të shkurtuar, ai dënohet përfundimisht me 10 vite burg, do të qëndrojë në burg të sigurisë së lartë.

Esmir Murati është dënuar me 12 vite për trafik droge dhe grup i strukturuar kriminal, por i ulet në 8 vjet për shkak të gjykimit të shkurtuar. Albert Prenga dënohet gjithashtu me 12 vite, por i ulet në 8 vjet.

Bujar Ajeti (Gremizi) është dënuar me 9 vite burg për veprat penale sigurim kushtesh për vrasje, përkrahja e autorit të krimit, grup të strukturuar kriminal dhe armëmbajtje pa leje. Përfundimisht, në aplikim të gjykimit të shkurtuar, ai do të bëjë 6 vite burg në një burg të sigurisë së lartë.

Adrian Cenaj (Dedja) dënohet me 6 vite, por me gjykim të shkurtuar, i zbresin në 4 vite për akuzat e sigurimit të kushteve për vrasje dhe grup të strukturuar kriminal. Albert Prenga dënohet gjithashtu me 12 vite për trafik droge dhe grup të strukturuar kriminal, por i ulet në 8 vjet.

Të gjithë të dënuarit u shpallën fajtorë për sigurimin e kushteve për vrasjen e vëllezërve Nela dhe trafikimin e kokainës nga Amerika Latine drejt BE-së. Vuajtja e dënimit fillon nga dita e arrestimit dhe do të kryhet në burgje me siguri të lartë.

Gjykata gjithashtu ka vendosur rikthimin e sendeve dhe automjeteve të sekuestruara si provë materiale. Bujar Ajetit i kthehen tre telefona dhe automjeti që iu sekuestrua. Vendosi konfiskimin e një automjeti tip Mercedez Benz dhe tre telefonave të Adrian Cenajt. Bujar Ajetit i konfiskohen një pistoletë, armë gjahu, telefona dhe kalojnë në favor të shtetit. GJKKO urdhëroi gjithashtu konfiskimin e një llogarie bankare me vlerë 77 998 euro si dhe një celular. Ndërsa Dedan Gjonit i konfiskohen një armë zjarri që iu sekuestrua më herët, dyu krehëra pistolete, si edhe një dokument për autorizimin e mbajtjes së armës së zjarrit në banesë.