Osumi është rikthyer në shtratin e vet, por gjurmët e dëmeve janë të dukshme në çdo oborr dhe parcelë. Në fshatrat Çiflik dhe Arrëz, por edhe në lagjen “Dafinat” të bashkisë Dimal, dhjetëra familje vijojnë ende pastrimin e banesave dhe serave, ndërsa jashtë shtëpive janë hedhur mobilje, pajisje shtëpiake dhe dhoma gjumi të nxjerra nga balta.
Banorët tregojnë se serat u përmbytën tërësisht, duke shkatërruar të gjithë prodhimin e specit dhe trangullit. Dëmet janë kolosale për ekonominë bujqësore.
“Uji arriti mbi një metër. Serat u mbuluan të gjitha dhe prodhimi u shkatërrua i gjithi. Na është bërë dëm rreth 5 milion lekë për çdo serë. Do na duhen 2–3 muaj vetëm të thahen serat që të mund të mbjellim sërish. Uji na mori pulat, gjelat e detit, foragjeret… çdo gjë është nën ujë,” – shprehen banorët.
Sipas tyre, mbyllja e kanalit të madh që përshkon zonën nga ana e bashkisë Dimal ka bërë që uji të mos ketë dalje dhe të depërtojë drejt banesave, tokave dhe serave.
“Kemi disa ditë të përmbytur. Nga bashkia nuk ka ardhur askush, as të na shohë, as të përllogarisë dëmet. Jemi të rrënuar ekonomikisht,” – thonë banorët, të cilët i bëjnë apel shtetit për ndihmë të menjëhershme.
Nga konstatimet paraprake të Shtabit të Emergjencave në Prefekturën e Beratit, raportohen: 80 ha tokë bujqësore dhe pemëtari të përmbytura në Çiflik dhe Arrëz (Bashkia Dimal) 25 ha sera të përmbytura (po në bashkinë Dimal) 13 ha tokë bujqësore dhe ullishte të dëmtuara në Veterrik dhe Starovë (Bashkia Berat)
Disa hektarë tokë bujqësore dhe sera të dëmtuara në Bashkinë Kuçovë. Banorët presin vlerësimin zyrtar të dëmeve dhe dëmshpërblim.
gijotina.com/
Discussion about this post