“Milionere” e inceneratorëve, flet me lot në sy e moshuara që mbledh kanaçe: Jam e sëmurë

E moshuara Merita Hajdari, e cila rezultoi “milionere” e aferës së inceneratorëve, por që në të vërtetë jetonte me mbledhjen e kanoçeve në kosha, ka bërë një rrëfim me lot në sy për “News24” teksa tregon se është pa shtëpi dhe invalide.

Merita thekson se nuk e di kush ia ka bërë këtë lojë, ndërkohë që i vjen keq se tashmë e thërrasin të gjithë biznesmene, ndërsa rezulton borxhlie nëpër banka për shkak të një kredie të marrë në vitin 2019 pasi iu dogj shtëpia.

“Unë nuk kam biznese, jam fukareshë, jam invalidë, e sëmurë me azmë. Unë jetoj e punoj në një shtëpi, shkoj te fruta-perime seleksionoj aty dhe më japin ndonjë ushqim. Paguaj banka, sepse më 2019 unë jam djegur. Më ka plasur bombola me gjithë djalin dhe shteti nuk na dha asnjë shpërblim, që u dogja, dhe shkova në spital në gjendje kome. Unë pastroj shkallë, për bukën e gojës, nuk kam të ardhura. Jam kreditore, më 15 kam për të paguar bankën dhe nuk kam me çfarë ta paguaj. Dua një drejtësi timen, kush m’i ka bërë këto gjëra, që unë jam biznesmene”, tha ajo.