Protesta e minatorëve të Spaçit në Mirditë ka hyrë në ditën e 17-të, ndërsa kompania turke “Tete Albania” vazhdon të mos japë asnjë reagim lidhur me kërkesat e punonjësve. Situata në zonën minerare mbetet e tensionuar, ndërsa grevistët shprehen të zhgënjyer nga mungesa e përgjigjes nga drejtuesit e kompanisë.
Minatorët theksojnë se janë të vendosur të mos tërhiqen, duke deklaruar se do të vazhdojnë grevën deri në momentin që do të marrin një përgjigje zyrtare. Ata kanë paralajmëruar përshkallëzim të protestës, nëse kërkesat e tyre nuk do të merren parasysh nga kompania apo autoritetet shtetërore.
Punonjësit e nëntokës kërkojnë njohjen zyrtare të sindikatës dhe nënshkrimin e kontratës kolektive të punës, të cilat i konsiderojnë thelbësore për përmirësimin e kushteve të punës dhe garantimin e të drejtave të tyre ligjore. Sipas minatorëve, mungesa e dialogut po vë në rrezik jo vetëm mirëqenien e tyre, por edhe sigurinë në vendin e punës.
Discussion about this post