Minatorët protestë para Kuvendit: Na keni lënë në mjerim!

Minatorët u ngritun në protestë ditën e sotme pak para nisjes se seancës plenare, para Kuvendit të Shqipërisë.

Kryefjala e protestës së tyre janë kushtet ekonomike dhe statusi i minatorit.

Minatorët kanë deklaruar se pensionet që marrin janë tejet të ulëta dhe nuk u mjaftojnë as për të blerë ilaçe, e jo më për të jetuar normalisht.

“Minatorët duan status duan kushte ekonomike. Ju na keni lënë në mjerim dhe tani po vuajmë. Secili nga ne ka 2-3 palë ilaçe me vete. Pensioni qesharak që na keni dhënë nuk na del as për ilaçe”, tha njëri prej tyre.

Ndërkohë, një tjetër prej pjesëmarrësve në protestë i ka bërë thirrje Kuvendit të votojnë statusin e veçantë, ndërsa është shprehur “nëse nuk e bëni, ju vraftë gjaku i rënë i minatorëve”.

“Ky është realiteti shqiptar, ta marrë vesh gjithë bota. Ne minatorët jetojmë më një pension qesharak, nga 180-280 mijë lekë të vjetra. I bëj thirrje ministrave të miratojnë kërkesat dhe statusin e minatorit, të respektoni Kushtetutën dhe votën e popullit. Nëse nuk e bëni, ju vraftë gjaku i rënë i minatorëve. Minatorët kanë punuar me ndershmëri, ndërsa ju për të na vjedhur”, është shprehur një tjetër prej minatorëve.

Ata paralajmëruan protesta të vazhdueshme nëse kërkesat e tyre nuk plotësohen.