Në mbledhjen e parë të qeverisë, kryeministri Rama njohu ministrat me Kodin Etik në lidhje me përfitimet për shkak të detyrës, duke u bërë të ditur që nuk duhet të përfitojnë që nga dhuratat për shkak të detyrës, e deri tek udhëtimet e punës.
Ai u shpreh se para vitit 2013 kjo magazinë ka qenë bosh, ndërsa shtoi se ata që ikën para këtij viti jo vetëm që nuk lanë asgjë, por morën objektet nga lugët deri te pirunjtë.
“Sot kryeministria ka një magazinë të posaçme ku ruhen të gjitha dhuratat për shkak të detyrës pavarësisht vlerës së tyre. Deri në vitin 2013 nuk u la në këtë godinë asnjë dhuratë. Zero. Madje jo vetëm nuk kanë lënë atë që kanë marrë, por kanë marrë piktura, kompjutera, lugë, pirunj, filxhanë. Çdo gjë duhet shkruar në aneksin e kodit. Çdo gjë duhet dorëzuar në stok. Të gjitha mund të tingëllojnë si gjëra të vogla por në fakt janë norma të zbatuara në të gjitha shtetet që meritojnë të quhen të tilla.
Ai paralajmëroi sanksione për rastet kur abuzohet me shpenzimet për udhëtime pune apo për të organizuar darka me buxhetin e shtetit.
“Dokumenti për rregullat duhet të parashikojë sanksione për çdo rregull të normave etike që do miratohet në mbledhjen e tretë të qeverisë. Shpenzimet për udhëtimet jashtë shtetit, që nuk do të mbyllen nuk do paguhen nga thesari i shtetit. Kjo do të shtrihet në të gjitha nivelet e larta drejtuese. Është e pajustifikueshme të mos mbetet asnjë gjurmë nga një pjesë e kontakteve për jashtë. Të ikësh dhe vish për punë shteti pa lënë asnjë gjurmë nuk është normale”, tha Rama.
Kryeministri u shpreh se çdo dhuratë që marrin anëtarët e kabinetit për shkak të detyrës do të ruhet në një magazinë të posaçme.
