Ministri i Drejtësisë, Besfort Lamallari, ka reaguar pas vrasjes së gjyqtarit të Gjykatës së Apelit, Astrit Kalaja, duke e cilësuar sulmin si një akt të rëndë kriminal dhe një sulm ndaj gjithë sistemit të drejtësisë, institucioneve dhe vetë shoqërisë shqiptare.
Në një deklaratë publike, Lamallari u shpreh se ky atentat në zemër të një institucioni të drejtësisë është një vijë e kuqe që askush nuk duhet ta kalojë, dhe shteti do ta mbrojë me vendosmëri jetën dhe integritetin fizik të njerëzve të drejtësisë.
“Sulmi me armë ndaj gjyqtarit Kalaja është sulm ndaj çdo shërbyesi të së drejtës. Ky akt kriminal duhet dënuar me gjithë forcën e ligjit. Ne nuk do të lejojmë që ngjarje të tilla të cënojnë besimin e publikut te drejtësia apo të errësojnë përpjekjet tona për forcimin e shtetit të së drejtës,” – tha Lamallari.
Ministri theksoi se nevojitet një rishikim i sistemit të sigurisë së brendshme në gjykata, ndërsa paralajmëroi ashpërsim të ndjeshëm të dënimeve për armëmbajtje pa leje, përmes ndryshimeve në Kodin e ri Penal, i cili është aktualisht në fazën e konsultimit publik.
“Armëmbajtja pa leje nuk do të trajtohet më si deri më sot. Ajo është rrezik i drejtpërdrejtë për sigurinë publike dhe për njerëzit e drejtësisë,” – u shpreh ministri.
Në përfundim, Lamallari shprehu ngushëllime për familjen dhe kolegët e gjyqtarit Kalaja dhe uroi shërim të shpejtë për dy të plagosurit e tjerë.
“Asnjë akt kriminal nuk do të frikësojë drejtësinë. Misioni i magjistratëve do të vazhdojë. Ministria e Drejtësisë qëndron krah për krah me të gjithë trupën gjyqësore,” – përfundoi Lamallari.
Discussion about this post