Ballkani Perëndimor duhet të integrohet sa më parë në Bashkimin Europian, sipas ministrit të Jashtëm grek, Nikos Dendias. Sipas tij nëse ky integrim nuk realizohet Ballkani do të funksionojë sërish si “Ballkan”. Situatën aktuale në Maqedoninë e Veriut Dendias e cilësoi si një nisje të krizës, duke iu referuar asaj që pritet të ndodh nesër në Kuvendin e Maqedonisë së Veriut.
Ai tha se rezultati nuk duhet paragjykuar pasi qeveria e Zaev e ka kryer ciklin e saj. Ai foli dhe për marrëdhëniet mes Greqisë dhe RMV, ku theksoi se se Greqia është mike dhe aleate e vazhdueshme e Maqedonisë së Veriut, me kusht që t’u përmbahet marrëveshjeve.
Parlamenti Maqedonisë së Veriut do të votojë të enjten për një mocion mosbesimi ndaj qeverisë së drejtuar nga socialdemokratët. Kryeministri Zoran Zaev njoftoi dorëheqjen e tij një javë më parë pasi socialdemokratët (LSDM) pësuan një humbje të thellë në zgjedhjet lokale. Megjithatë, ai ende nuk ka dhënë dorëheqjen zyrtarisht.
Ministri grek u ndal të fliste dhe për dialogun Kosovë-Serbi, duke theksuar se Greqia nuk dëshiron që mosmarrëveshja atje të vazhdojë dhe shprehu shqetësim të thellë për Bosnje-Hercegovinën dhe situatën në Mal të Zi.
Më datë 16 nëntor pritet të zhvillohet raundi i ri i takimeve të kryenegociatorëve të Kosovës dhe Serbisë, për të diskutuar zbatimin e marrëveshjeve të arritura deri më tani, çështjet e hapura dhe rrugën përpara në dialog. Lajmi është bërë i ditur nga zëdhënësi i Bashkimit Evropian, Peter Stano.
Edhe pse është konfirmuar data e rinisjes së dialogut mes dy vendeve, zyrtarët e Bashkimit Europian nuk kanë mbajtur ende një qëndrim mbi deklaratën e presidentit serb, Aleksandar Vuçiq për formim të Asociacionit të komunave me shumicë serbe.
Discussion about this post