Ndërsa u shkelte syrin i relaksuar gazetarëve, Taulant Balla, i emëruar në mes të korrikut, ndihej imun ndaj eksperimentit social që Edi Rama po ushtronte në Asamblenë e PS.
Me më pak se dy muaj në krye të Ministrisë së Brendshme, ai ishte i vetmi që e dinte se nuk do të shkarkohej, sigurisht me intuitë. Por në fakt nuk ndodhi tamam kështu.
Pasi përmendi gjithë ministrat që emëroheshin, pa folur asnjë fjalë për ata që shkarkohen, pa motivacion, pa falenderim, Kryeministri shkriu Ministrinë e Standartizimit, të Milva Ekonomit dhe njoftoi krijimin e Ministrisë së Pushtetit Lokal.
Përveç faktit, që Ministria e Standartizimit, shpenzoi kot për 2 vjet paratë publike dhe nuk u tha asgjë, ministria e re, e Pushtetit Lokal, në fakt është një ndarje e Ministrisë së Brendshme. Ky është një ndryshim i rëndësishëm strukturor, që do të shkaktojë probleme buxhetore dhe infrastrukturore.
Ministria e Brendshme është bashkim i Ministrisë së Rendit dhe Pushtetit vendor. Në strukturën e saj, mund të shihet qartë se janë strukturat qeveritare që kontrollojnë dhe bashkëpunojnë me Pushtetin Vendor.
Agjencia për Mbështetjen e Vetëqeverisjes Vendore (AMVV) me drejtor Arben Skënderin, Drejtoria e Politikave të Çështjeve Vendore me drejtor Arben Xhaferin, Drejtoria e Përgjithshme e Gjendjes Civile me drejtor Vangjush Stavron, janë tre drejtori pa të cilat Ministria e Pushtetit Vendor nuk mund të ekzistojë. Për të mos folur pastaj për IKMT dhe Zjarrfikset, që si rregull i takojnë pushtetit lokal.
Madje në qeveritë e mëparshme socialiste, Ministria e Pushtetit Vendor ka qenë më vete, në të njëjtën godinë me Ministrinë e Rendit. Ministra të Pushtetit Vendor kanë qene Bashkim Fino, Ben Blushi, Arben Imami, Arben Demeti. Deri në 2005, kur Berisha i sapozgjedhur i shkriu në MInistrinë e Brendshme të dyja ministritë. Që atëherë pushteti vendor, ka patur si kujdestar një nga zëvendësministrat e Brendshëm.
Të hënën e 4 shtatorit, Ministria e Pushtetit Vendor u kthye, Rama shkoi tek paraardhësit socialistë, ndërsa Taulant Balla u shkarkua nga Ministër i Pushtetit Vendor, për të mbetur vetëm Ministër i Rendit. Nuk dihet nëse Kryeministri do ia ndryshojë edhe emrin,nuk dihet nëse Mazniku dhe Balla do të bashkëjetojnë në të njëjtën godinëm, që sot ëstë Ministria e Brendshme. Për këto as ka informacion, ndoshta nuk ka as ide.
E vetmja gjë që mund të thuhet deri tani, është se Taulant Balla u shkarkua nga MInistër i Pushtetit vendor, duke u bërë gjysmë-ministër. Në vend të tij u emërua Arbian Mazniku. Duke mos përmendur emrat e të shkarkuarve, Rama e fshehu këtë shkarkim, megjithëse bëhet fjalë për një ministri të rëndësishme./ Dosja.al
Discussion about this post