Qeveria e Kosovës të mërkurën ka miratuar masat e reja anti-Covid. Këto masa, do të hyjnë në fuqi duke nisur që nga dita e nesërme.
Ministri i Shëndetësisë, Arben Vitia, në mbledhjen e qeverisë tha se masat e përcaktuara nuk përfshijnë në asnjë rast vaksinimin me detyrim.
“Masat e ndërmarra përmes këtij vendimi nuk përcaktojnë, në asnjë rast vaksinimin me detyrim, duke qenë se kufizimet e vendosura ndaj publikut mund të përmbushen me paraqitjen e dëshmisë së statusit të vaksinimit, të rezultatit të një testimi që arrin në përfundimin se personi nuk është i infektuar me Covid-19, ose se personi është shëruar nga Covid-19 dhe ka antitrupa mjaftueshëm”, deklaroi Vitia.
Sipas masave të reja që hyjnë në fuqi nga 20 dhjetori dhe janë të vlefshme deri më 1 shtator, ndalohet veprimtaria e klubeve të natës, mbajtja e dasmave, fejesave dhe ahengjeve tjera familjare.
Po ashtu, nga data 20 gusht deri më 1 shtator, hyrja në ambientet ku mbahen grumbullimet, tubimet si festivalet dhe koncertet, aktivitetet sportive dhe kulturore të cilat kanë kapacitet mbi 100 persona, si dhe organizimi i këtyre aktiviteteve, lejohet vetëm nëse pjesëmarrësit posedojnë certifikatën e vaksinimit me një apo dy doza të vaksinës, test PCR negativ jo më të vjetër se 72 orë, dëshmi se personi e ka kaluar Covid-19 apo test antigjen jo më të vjetër se 48 orë.
