Kombëtarja kuqezi do të luajë ndaj Arabisë Saudite më 26 tetor, një ndeshje miqësore. Duke qenë se kjo miqësore do të luhet në një periudhë jo shumë të zakonshme, pasi kampionatet europiane vazhdojnë aktivitetin e tyre, trajneri Edy Reja do të provojë elementë të rinj në skuadër.
Për shkak se kjo përballje luhet jashtë datave të lira nga FIFA, këtë herë nuk do të kemi “yjet” e zakonshëm. Mes emrave të rinj që u thërritën për këtë takim miqësor ishte edhe Jasir Asani.
Sulmuesi 28-vjeçar luan me ekipin e Kisvarda në Hungari dhe në këtë sezon ka 11 paraqitje, por nuk ka arritur ende që të shënojë në kampionat.
“Sport Time” zbulon ekskluzivisht se lojtari e ka refuzuar ftesën e Shqipërisë për takimin miqësor me Arabinë Saudite, pasi nuk është lejuar nga klubi i tij Kisvarda që t’i bashkohet kuqezinjëve.
Klubi hungarez dëshiron shërbimet e Jasirit për ndeshjet e kampionatit që bien ndesh me përballjen ndaj Arabisë.
Në sezonin e shkuar Asani realizoi 6 gola dhe bindi drejtuesit e klubit me aftësitë e tij.
Ndërkohë vlen të theksohet se për këtë element ka pasur kontakte edhe nga Maqedonia e Veriut, që të përfaqësojë këtë fanellë.
Kjo miqësore është një mundësi fantastike për protagonistët e Superiores dhe futbollistët e tjerë në Europë që nuk kanë pasur vëmendjen e Kombëtares në takimet e tjera, që të thonë fjalën e tyre me fanellën kuqezi, qoftë edhe për një ndeshje të vetme.
Discussion about this post