Komisioni Rregullator pranë Komisionit Qendror të Zgjedhjeve ka miratuar me tre vota pro dhe një kundër, rezultatin përfundimtar të zgjedhjeve vendore të 14 majit.
Kryetarja e Komisionit Rregullator, Ilirjana Nano dhe dy anëtarët Dritan Çaka dhe Arens Çela votuan pro ndërsa Muharrem Çakaj votoi kundër projektvendimit.
Podiumi kryesohet nga Partia Socialiste, e cila ka regjistruar 579 mijë e 625 vota ose 43.11 për qind të tyre, Koalicioni opozitar “Bashkë Fitojmë” ka marrë 247 mijë e 883 vota ose 18.44 për qind ndërsa Partia Demokratike ka arritur 103 mijë e 743 vota ose 7.71 për qind.
Sipas shifrave zyrtare të KQZ-së, kanë qenë gjithsej 1 milion e 344 mijë e 497 vota të vlefshme.
Më 16 maj u mbyll krejtësisht procesi zgjedhor për kandidatët në 61 bashki të Shqipërisë, ku do të shpalleshin përfundimisht edhe fituesit në të gjithë vendin.
Në ndarjen tërësore, janë 53 bashki, të cilat kanë shkuar për Partinë Socialsite, duke konfirmuar kështu një fitore bindëse në rang kombëtar.
Nga ana tjetër, koalicioni Bashkë Fitojmë arriti të marrë vetëm shtatë mandate dhe një, i ka shkuar partisë së minoritetit etnik grek MEGA.
Discussion about this post