Mishi i importuar me salmonelë/ Denaj: Mos bëni politikë me ushqimin

Një skandal është regjistruar në vendin tonë, me përgjegjës Ministrinë e Bujqësisë dhe Autoritetin Kombëtar të Ushqimit, teksa një sasie prej mbi 18 ton filetosh pule me salmonelë është futur përmes Portit të Durrësit dhe vinte nga Brazili, teksa 13.1 ton kompania “AMG FOOD“, ose e njohur me emrin tregtar si “diMal“ e ka hedhur në treg dhe është konsumuar nga qytetarët.

Për rastin në fjalë është shpallur në kërkim pronari i komanisë “diMal”, Mondi Goxha, teksa janë vënë nën hetim dhe tre inspektorë të AKU-së.

Siç duket, për këtë skandal kërkohet që përgjegjësia të kalojë vetëm tek inspektorët e thjeshtë, teksa drejtori i AKU-së Manush Kullolli dhe ministrja e Bujqësisë Anila Denaj, nuk e kanë aspak ndërmend të mbajnë përgjegjësi, por vazhdojnë fushatën për të mbledhur vota për partinë në pushtet për zgjedhjet e 11 Majit.

Anila Denaj, si shumë zyrtarë të tjerë të Qeverisë dhe punonjës të Administratës, ka qenë sot e pranishme në Athinë, ku Edi Rama do të mbajë një miting me shqiptarët që banojnë në kryeqytetin grek.

Në një prononcim për Euronew Albania nga Athina, Denaj tha se nuk duhet të politizohet çështja e ushqimit dhe se rasti duhet të shqyrtohet nga institucionet përkatëse. Sipas saj, AKU e ka kryer detyrën e saj sipas protokolleve.

“Është gjithmonë kënaqësi të jesh në Athinë me bashkëatdhetarët. Situata e AKU është e qartë; agjencia ka kryer detyrën dhe ka realizuar kontrollet e nevojshme. Sigurisht, lajmi është bërë publik, janë konfirmuar përgjigjet e analizave dhe i gjithë zinxhiri i kontrollit, për të cilin AKU ka denoncuar ata që kanë shkelur protokollet. Çështja i takon insitucioneve si krimi ekonomik, policia që duhet të japin gjykimin përkatës. Nuk bëhet politikë me ushqimin, është shumë e rëndësishme që të verifikohen prononcimet në media nga institucionet shtetërore. Jo vetëm që kemi reaguar, por gjithashtu i kemi çuar çështjet përpara institucioneve. Por, politikë me ushqimin nuk bëhet, institucionet janë aty për të garantuar zbatimin e protokolleve, të cilat janë të shkruara dhe të zbatuara nga ne. Jam gjithmonë në shërbim të sqarimit, por vetëm për publikun.” – deklaroi Denaj.