Kryeministri Kyriakos Mitsotakis njoftoi rritjen e pagës minimale nga 1 prilli në 780 euro në Greqi duke thënë se kjo është rritja e tretë radhazi gjatë qeverisjes së tij.
Në fjalën e tij, Mitsotakis i shpreh se në vitin 2019 paga minimale ishte 650 euro “që do të thotë se që atëherë janë shtuar edhe tre paga shtesë për 600 mijë punëtorë”.
Mitsotakis shtoi se është momenti për të mbështetur punëtorët me një rritje të guximshme.
“Nuk kam iluzione, e di që në vendin tonë rrogat janë ende të ulëta dhe ato janë të shtypura më shumë nga inflacioni i importuar. E dëgjoj gjatë gjithë kohës sidomos nga të rinjtë dhe të rejat që e kanë të vështirë. Rritje e re padyshim nuk e zgjidh problemin por është një lehtësim i konsiderueshëm dhe mbi të gjitha tregon synimin tonë për të rritur pagat si në sektorin publik ashtu edhe në atë privat.
Dua të theksoj se shuma përfundimtare që është rënë dakord është në kufirin e sipërm të mundësive tona, megjithatë është brenda mundësive të bizneseve që u mbështetën nga qeveria gjatë pandemisë.
Në të njëjtën kohë, dua të theksoj se ekonomia greke është në një zhvillim dinamik, papunësia është në rënie të vazhdueshme, taksat janë ende në rënie. Prandaj tani është koha për të mbështetur punëtorët me një rritje të guximshme të pagës bazë sepse dividenti i rritjes duhet të korret me drejtësi nga të gjithë”, përfundoi kryeministri në njoftimin e tij për rritjen e pagës minimale që do të hyjë në fuqi nga 1 prilli.
Discussion about this post