Kjo është pamja e Durrësit sot; rrugë të mbuluara nga uji, makina që rrezikojnë të mbeten në mes të rrugës dhe qytetarë që kalojnë mes rrugëve të tejmbushura me ujë për të shkuar në punë apo për t’u kthyer në shtëpi. Një situatë e turpshme, e përsëritur dhe tashmë e zakonshme për një qytet që pretendohet të jetë ndër më të rëndësishmit në vend.
Nuk është hera e parë. Nuk është as e dyta. Sa herë bie shi, Durrësi paralizohet. Uji pushton rrugët, infrastruktura dorëzohet dhe qytetarët mbeten vetëm përballë pasojave. Ndërkohë, Bashkia Durrës vazhdon të sillet sikur problemi nuk ekziston, ose sikur është një “fatkeqësi natyrore” dhe jo dështim i qartë i menaxhimit.
Qytetarët janë detyruar të zgjedhin mes dy të këqijave: ose të rrezikojnë të mbysin makinën, ose të ecin mes ujit. Ky nuk është thjesht shqetësim, por poshtërim i përditshëm për njerëzit që paguajnë taksa dhe presin shërbime minimale.
Bashkia Durrës ka dështuar prej vitesh të investojë seriozisht në kanalizime dhe infrastrukturë urbane. Miliona janë hedhur për fasada, beton dhe propagandë, ndërsa rrugët mbyten me çdo reshje shiu. Ky është realiteti i një qyteti të lënë pas dore, ku prioritetet janë kthyer përmbys.
Discussion about this post