Në kuadrin e primareve të Partisë Demokratike, një risi e rëndësishme ka qenë përfshirja e Dr. Erion Dashos në garën e Qarkut të Beratit. Mjeku dhe eksperti i njohur i shëndetësisë, i spikatur për angazhimin e tij publik dhe qëndrimet e forta opozitare, është rikthyer nga Gjermania për të dhënë kontributin e tij në zhvillimet politike në vendlindje.
Edhe pse i larguar prej vitesh për shkak të angazhimeve profesionale në Gjermani, Dr. Dasho nuk është shkëputur kurrë nga Shqipëria dhe veçanërisht nga Berati. Në garën e primareve të Partisë Demokratike, ai siguroi një rezultat dinjitoz, duke u renditur në vendin e tretë mes dhjetë kandidatëve, një tregues i qartë i mbështetjes që ka mes demokratëve dhe opozitarëve të Beratit. Nga informacionet e Bold News, Dr. Erion Dasho është deri tani e vetmja kandidaturë nga diaspora që kalon pragun e primareve të opozitës.
Ajo çka i bëri më të veçanta primaret në Berat, është se përfshirja e Dr. Dashos në garën e brendshme të demokratëve u prit me entuziazëm, jo vetëm nga strukturat e PD-së, por edhe nga qytetarët beratas të cilët shohin tek ai një figurë me integritet intelektual dhe profesional, një ekspert të shquar të shëndetësisë, një zë kritik të qeverisë dhe një nga opozitarët më të vendosur kundër regjimit të Rilindjes. Me analizat e tij të mprehta dhe argumentet e bazuara në fakte, Dr. Dasho është bërë një figurë e njohur në debatet publike, duke ekspozuar dështimet e qeverisë, sidomos në sektorin e shëndetësisë.
Në fushatën brenda demokratëve, Dasho ju rikthye shpesh temave të tij të njohura si shkatërrimi i sektorit shëndetësor dhe megaskandali i koncesioneve të shëndetësisë, për të kaluar tek korrupsioni qeveritar, bashkëqeverisja e rilindjes në aleancë me krimin dhe narkotrafikun, etj. Dasho u ndal në veçanti tek degradimi ekonomik, braktisja masive e Beratit nga të rinjtë dhe shkatërrimi i çdo mundësie për zhvillim.
Është pikërisht ky kontekst i errët, që e bën përfshirjen në politikë të figurave si Dr. Dasho shenjë shprese për një ndryshim të vërtetë. Me kandidatë të tillë, Partia Demokratike rikthen besimin e qytetarëve dhe synon të ndryshojë rezultatin elektoral në Berat drejt një fitoreje të opozitës në zgjedhjet e 11 majit.
Alternativa që ofron PD me personalitete me integritet, ekspertizë dhe vizion është e vetmja mundësi për të shpëtuar Beratin nga bataku i keqqeverisjes dhe për ta kthyer atë në një qytet dinjitoz, me ekonomi të fortë, dhe në një mundësi për të gjithë qytetarët beratas në Shqipëri dhe diasporë.
Discussion about this post