Mjeku i njohur epidemiolog, Ilir Alimehmeti, me anë të një postimi në Facebook, ka reaguar mbi variantet e reja të Covid-19, duke dhënë një shpjegim të gjatë për përhapjen e rastit “Mu” dhe duke u shprehur se “Injoranca është prindi i frikës”.
Më pas ai tregon se në të vërtet, “Delta” e dominon variantin “Mu” duke mos e lejuar përhapjen e tij.
“Delta duket se e dominon variantin Mu dhe nuk lejon përhapjen e tij, dhe virusi nuk di greqisht, kështu që emërtimi i varianteve me shkronja greke nuk pasqyrohet domosdoshmërisht në agresivitet apo infektueshmëri më të lartë”-shpjegon Alimehmeti.
Varianti “Mu” është zbuluar për herë të parë në Kolumbi, në fillim të vitit, ku është raportuar në disa shpërthime sporadike të të infektuarve në pjesë të Amerikës së Jugut dhe Evropës.
Derisa përbën vetëm një pjesë të vogël të rasteve globale, shkencëtarët po studiojnë nëse ai ka karakteristika që e tejkalojnë mbrojtjen e krijuar nga vaksinimi ose infeksioni i kaluar.
