Epidemiologu Tritan Kalo ka ngritur sot një shqetësim, ku citon se qytetarët në vendin tonë e kanë të pamundur të ruajnë higjienën, pasi nuk kanë ujë nëpër shtëpi. Përmes një postimi në rrjetin social Facebook ai shkruan se, sot jemi bërë më keq se komunizmi, pasi nëpër pallate ose mungon uji tërë ditën dhe në atë orar që vjen nuk ka fare presion të mjaftueshëm për të pastruar mirë duart dhe fytyrën.
Duke bërë një paralelizëm më kohën e komunizmit ai thekson se të paktën uji në atë kohë ishte i disponueshëm 24 orë në pallate dhe kudo.
“Kohë kovidiane…31.01.2022…Ditë e javë sa më të mbarë miq, dashamirës, të afërm dhe bashkëkombas….Ka vite që vargu “Anës detit i palarë…” (“Anës lumenjve”, Th. S. Noli), më vjen ndërmënd sa herë më duhet të lahem/bëj dush ose të laj teshat në fund të javës… Uji ose nuk vjen me presionin e zakonshëm dy-tre herë në ditë, kur ai rrjedh në çezmat tona me ndihmën e një pompe ose edhe “nuk turpërohet të mos vijë fare”….Unë jam në katin e tretë, mendoni familjet që ndodhen në dy katet sipër banesës sime…
Fatmirësisht ka në shitje “letra të lagura për bebet”, të cilat na mundësojnë edhe ne “bebet e rritura” të qëndrojmë të pastër….KUR kemi hyrë në këtë pallat në Dhjetor 1962 dhe deri në Maj-Qershor 1992, të 24 orët e ditës UJI KURRË nuk mungonte në çezmat tona….RRËNOFTË DEMON-KRACIJA që na e hoqi “këtë bezdi””, shprehet ai. Sipas mjekut, kjo problematikë u shfaq që në kohën kur Bashkia Tiranë bëri disa ndërhyrje në linjën e ujësjellësit dhe në vend ta përmirësonte e përkeqësoi fare situatën.
Discussion about this post