Mohonte pandeminë dhe ishte kundër vaksinës, “njeriu më i fortë në Belgjikë” ndërron jetë nga Covid

Frederic Sinistra, ish-kampioni i botës në kikboks, është ndarë nga jeta në moshën 41-vheçare për shkak të Covid-19.

I njohur si “Varrmihësi” apo “Njeriu më i fortë në Belgjikë”, ai kishte mohuar vazhdimisht pandeminë dhe ishte kundër vaksinimit dhe disa kohë më parë refuzoi gjithashtu shtrimin në spital.

Bashkëshortja e tij e mohoi se ish-kampioni ka vdekur nga koronavirusi.

“Unë e bëj një pikë nderi dhe do të luftoja deri në fund që të rikthehet e vërteta dhe emri i tij të pastrohet nga të gjitha këto shpifje. Burri im nuk vdiq nga Covid dhe nuk do të pranonte kurrë që ajo që i ndodhi të përdorej për të përhapur frikë dhe për të kërkuar vaksinimin. Vetëm jini të durueshëm dhe ne do t’ju përgjigjemi të gjitha pyetjevetuaja”, shkruhet në një postim të saj në Instagram.

Pak kohë më parë ai kishte ndarë një postim me ndjekësit në rrjetet sociale, ku bënte me dije se ishte më mirë dhe tashmë po shërohej në shtëpi.

“Faleminderit për mbështetjen tuaj. Po shërohem në shtëpi, ashtu siç duhet. Do të kthehem një mijë herë më i fortë”, shkruante ai.