VIDEO/ Momenti kur shpërthen tritoli në banesën e gjyqtarit në Shkodër

Pamjet në video tregojnë momentin e shpërthimit të tritolit në banesën e gjyqtarit të Shkodrës, Tonin Sterkaj.

Ishte ora 02:55 e 28 prillit 2024 kur ndodhi ngjarja. Pamjet e filmuara nga një kamera sigurie tregojnë një person të veshur me rroba të errëta, kapuç në kokë dhe doreza të bardha si ato që përdorin mjekët, i cili afrohet tek banesa në lagjen “Tom Kola”.

Autori nxjerr tritolin nga xhupi, e vendos në cep të derës, më pas e ndez dhe largohet me vrap nga e njëjta rrugicë që u pa të vinte. Në orën 02:59 minuta ndodh shpërthimi.

Policia e ka marrë gjyqtarin në mbrojtje, ndërsa KLGJ miratoi sot 6 muaj mbrojtje të veçantë për të.

Në momentin e shpërthimit në banesë ka qenë gjyqtari dhe bashkëshortja e tij. Pista kryesore e hetimeve lidhet me detyrën e Tonin Sterkajt si gjyqtar, megjithatë po hetohen dhe pista të tjera.

Në dëshminë e tij për policinë, gjyqtari ka deklaruar se nuk ka pasur ndonjë çështje madhore në shqyrtim dhe se së fundmi nuk ka marrë kërcënime.

Tonin Sterkaj ushtron prej shumë vitesh detyrën e gjyqtarit në gjykatën e shkallës së parë në Shkodër ndërsa për një periudhë dy vjeçare ka punuar edhe si gjyqtar në gjykatën e Apelit të Shkodrës. Pas mbylljes së Apelit, Sterkaj u kthye si gjyqtar në Gjykatën e Shkalles se Parë të Juridiksionit të Përgjithshëm Shkodër.

Lidhur me rastin reagoi edhe Unioni i Gjyqtarëve të Shqipërisë duke theksuar se, “ky sulm i pabesë e burracak ka për qëllim jo vetëm frikësimin e magjistratëve por edhe cënimin e rendit e të sigurisë publike, si dhe forcimin e sundimit të ligjit dhe shtetit të së drejtës në vendin tonë”.

Ngjarjen e dënoi dhe Dhoma e Avokatëve të Shkodrës, që shtoi se “është cënim real i sigurisë së shtetit dhe nivelit të sigurisë publike në qytetin tonë”.