Një ngjarje e rëndë ka ndodhur në Tiranë. Një 68-vjeçar është marrë me forcë në rrugën “George W. Bush” në Tiranë dhe është mbajtur peng në një zonë periferike. Më pas autorët kanë kërcënuar bashkëshorten e 68-vjeçarit për t’i marrë 2 000 000 lekë.
Ngjarja ka ndodhur më datë 29.04.2025. Policia ka vënë në pranga pesë persona, bëhet fjalë për dy vëllezër të moshës 31 dhe 21 vjeç, një tjetër shtetas i moshës 21 vjeç si edhe një 32-vjeçare, dhe një shtetas 52-vjeç, banues të gjithë në Tiranë.
Shuma e parave i është dorëzuar 57-vjeçarit në zonën e Saukut, nga bashkëshortja e 68-vjeçarit.
Pas disa orësh kërkimi, autorët janë kapur dhe një shumë prej 1,746,000 lekësh, të sekuestruar gjatë hetimeve, është gjetur dhe konfiskuar.
Të arrestuar janë Sulejman Sina, Klinton Sina, Idajet Mashollari, Bajram Ibraliu, Nikoleta Begolli.
Burime nga grupi hetimor thonë se personi i marrë peng është Edvar Agalliu.
Sipas burimeve, kjo pengmarrje ka qenë e planifikuar, dhe 68-vjeçari ka rënë në kurthin e ngritur nga Nikoleta Begolli, një prej personave të arrestuar për këtë rast.
Nga hetimet ka rezultuar se Edvar Agalliu kishte filluar të fliste me Nikoleta Begollin, e cila kishte një lidhje me Sulejman Sinën, një person të dënuar më parë për vjedhje me dhunë.
Dyshohet se pas komunikimeve me Begollin, Agalliu është ftuar nga kjo e fundit që të shkojë në zonën e Pazarit të Ri, ku ka rënë në pritën e përgatitur nga një grup prej tre personash.
Pas takimit, Agalliu është detyruar të hipte në një automjet, ku është mbajtur i mbyllur dhe i kërcënuar nga autorët për të dorëzuar një shumë prej 2 milionë lekësh. Kërcënimi i drejtpërdrejtë ndaj jetës së tij ka detyruar bashkëshorten e 68-vjeçarit që të dorëzojë një pjesë të shumës së kërkuar. Pjesa tjetër e shumës u sekuestrua më vonë nga Policia gjatë operacionit të koduar “Imediat”.
Sulejman Sina, i cili ka qenë i përfshirë në këtë ngjarje, është një person me një histori kriminale, pasi më parë ka qenë i dënuar për vjedhje me dhunë.
Njoftimi i policise
Tiranë/Finalizohet operacioni policor i koduar “Imediat”.
Morën me forcë dhe mbajtën peng në një zonë periferike, një 68-vjeçar, si dhe kërcënuan bashkëshorten e tij, për t’i marrë 2 000 000 lekë. Kapen pas disa orësh, 5 shtetas që bashkëpunuan për kryerjen e këtij krimi.
Sekuestrohen 1 746 000 lekë nga shuma që bashkëshortja iu dha këtyre shtetasve.
Menjëherë pas informacioneve të siguruara nga inteligjenca policore, se më datë 29.04.2025, disa shtetas kishin marrë me forcë një shtetas, të cilin e kishin mbajtur peng dhe në këmbim të lirisë së tij i kishin marrë një shumë të madhe parash, specialistët e Sektorit për Hetimin e Krimeve të Rënda kanë organizuar punën për identifikimin dhe arrestimin e autorëve.
Si rezultat i veprimeve të shpejta dhe profesionale, të kryera në kuadër të operacionit “Imediat”, u arrestuan 5 shtetasit e dyshuar të implikuar në këtë rast, konkretisht: shtetasit Sulejman Sina, Klinton Sina, Idajet Mashollari, Bajram Ibraliu, Nikoleta Begolli..
Nga hetimet, pamjet filmike dhe provat e siguruara ka rezultuar se shtetasit S. S., K. S. dhe I. M., në rrugën “George W. Bush”, kanë marrë me forcë në një automjet dhe kanë mbajtur peng, në një banesë të braktisur të fshatit Kakunjë, shtetasin E. A., 68 vjeç. Dhe më pas kanë telefonuar bashkëshorten e tij, të cilën e kanë shantazhuar për jetën e 68-vjeçarit, duke i kërkuar shumën prej 2 000 000 lekësh. Kjo shumë i është dorëzuar shtetasit B. I., në zonën e Saukut.
Në vijim të veprimeve për zbardhjen e plotë të ngjarjes, janë kryer kontrolle në banesat e këtyre shtetasve si dhe në një automjet me të cilin lëviznin shtetasi S. S. dhe shtetasja N. B., ku u gjetën dhe sekuestruan 1 746 000 lekë të dyshuara të marra nëpërmjet kanosjes, nga bashkëshortja e shtetasit E. A.
Materialet procedurale iu referuan Prokurorisë së Tiranës, për veprime të mëtejshme.
Discussion about this post