Ish-deputeti Çlirim Gjata ka deklaruar ditën e sotme se vendimi i Lulzim Bashës për të përjashtuar Sali Berishën nga grupi parlamentar i PD-së është i gabuar.
Gjata, ish deputet demokrat, thotë se ia ka thënë në sy Bashës se ky vendim është i gabuar, ndërkohë ai shton se ka shkuar në takimin e Berishës ditën e djeshme sepse ai do të marrë pjesë në çdo takim të PD-së.
Sipas Gjatës, përjashtimi i Sali Berishës nga grupi i PD-së mund të çojë në shpërbërje të kësaj partie.
Rikujtojmë se një ditë më parë, Sali Berisha mbajti takimin e parë me demokratët në kuadër të iniciativës për referendum që ka marrë për zgjedhjen e një kryetari të ri. Berisha i kërkoi falje demokratëve për zgjedhjen e Bashës në krye të PD-së. Berisha nuk ka përjashtuar mundësinë e rikthimit në krye të PD-së.
“Kurrë nuk do të dëshiroja të diskutoja për këto momente. Ndodhen këto dhe përmbysen gjithçka. Kanë qenë disa veprime pas 25 prillit si zgjedhjet për kryetar, këshillin kombëtar etj. Momenti i përjashtimit të Berishës, mund të çojë në shpërbërje Partinë demokratike. Ishte takim i Partisë Demokratike, pavarësisht se e inicioi Berisha dhe patjetër që do të shkoja. Ku ka takim të PD patjetër që do të shkoj”, u shpreh ai në Top News.
Gjata shtoi se me rëndësi në këtë moment është diskutimi i ngjarjeve që çuan në këtë situatë.
