Ministri i Brendshëm, Bledi Çuçi, ka zhvilluar sot një takim me drejtues të lartë të Policisë së Shtetit dhe shefat e komisariateve në të gjithë vendin. Ai bëri me dije se në ndihmë të Policisë së Shtetit do të vijë edhe teknologjia, më konkretisht shërbimi i satelitit dhe më tej dronët. Ai kërkoi nga drejtuesit e Policisë së Shtetit që të mos tolerojnë asnjë presion të mundshëm politik të çfarëdo niveli qoftë, duke bërë të ditur se do të ketë shkarkime dhe përjashtim nga sistemi.
“Besoj që këtë vit të fillojmë me një risi në pjesën e kontrollit të territorit. Diku nga mesi i vitit do të kemi shërbimin satelitor që do të na prodhojë gati përditë foto të pjesëve të territorit të Shqipërisë, në ato zona që janë edhe më sensitive. Mund të kemi një avantazh tjetër që do të na krijohet për shkak të kontrollit të përditshëm të territorit nga sateliti. Me shpresë gjithashtu që nga fundi i vitit të fillojë edhe monitorimi me dronët super-inteligjentë. Por besoj se me satelitë do të fillojë më shpejt. Kush mbyll sytë për të toleruar kultivimin e kanabisit, do të shkatërrojë karrierën e vet”, tha ministri Çuçi.
Discussion about this post