Moti i keq ka përfshirë Korçën dhe qytetin e Elbasanit që nga pasditja e të shtunës, ndërsa ditën e sotme situata është përkeqësuar. OSHEE bënë me dije se reshjet e shumta të dëborës dhe era e fortë ka lënë pa energji elektrike qytetin e Korçës dhe atë të Elbasanit, si dhe fshatrat aty përreth.
Konkretisht, OSHEE thekson se kanë mbetur pa energji elektrike zonat që furnizohen nga linja Korçë – Bilisht, linja Ersekë – Mollas, si dhe linja Zëmblak 1 – Korçë.
“Prej 24 orësh, disa zona të vendit po përballen me mot të keq, shoqëruar me kushte ekstreme reshje dëbore, në formë stuhie dhe shpejtësi ere. Për pasojë janë dëmtuar linja dhe shtylla të rrjetit elektrik, duke prekur asetet e tensionit 110kV të OST dhe tensionin e lartë 35kV të OSHEE, kryesisht në juglindje të vendit.
Nga raporti i orës 13:00, rezulton se, zonat më problematike paraqiten ato të Korçës dhe Elbasanit, kryesisht zonat malore. Me defekt paraqitet linjat 35kV Korçë – Bilisht dhe Ersekë – Mollas, ku janë rrëzuar 10 shtylla. Në avari ndodhet edhe linja 110Kv e OST Zëmblak 1 – Korçë”, thuhet në njoftim. Sakaq, bëhet me dije se tashmë ndërhyrja është e pamundur për shkak të terrenit dhe reshjeve të shumta.
Discussion about this post