Edhe pse jemi në muajin shtator, plazhet e Vlorës frekuentohen nga pushues vendas e të huaj. Arsyet që i shtyjnë drejt bregdetit janë çmimet e ulëta në krahasim me muajt korrik e gusht, numri më i ulët i turistëve si dhe qetësia gjatë këtyre ditëve.
“Mirë, s’është keq. Në gusht ka pasur pak papastërti. Sivjet kam ardhur edhe në kulmin e sezonit, Po tani është më qetë, mirë kemi kaluar, për mua është shumë më mirë tani në këtë kohë” – është shprehur një nga pushuesit.
Duket se plazhet e Vlorës do të jenë destinacion për pushuesit edhe gjatë muajit shtator. Një numër i konsiderueshëm turistësh është shënuar dhe në këtë javë të parë shtatori. Pjesa më e madhe janë të huaj të ardhur nga Maqedonia, Ukraina, Bjellorusia, por nuk kanë munguar as ata vendas. Sipas tyre çmimet në këtë periudhë janë të ulëta, në krahasim me muajt e pikut, korrik e gusht.
Sipas pushuesve, qetësia është një tjetër faktor që i shtyn drejt pushimeve, pasi edhe numri i turistëve këtë periudhë është më i ulët. Për këtë arsye ata zgjedhin ti kalojnë këto ditë pranë bregdetit.
“Tani është më mirë, se është më qetë pasi në kulmin e sezonit ka më shumë njerëz” – shprehet një zonjë tjetër.
