Deputeti i Lëvizjes Bashkë, Redi Muçi theksoi se kreu i Grupit Parlamentar të PS-së, Taulant Balla tenton të tallet me protestuesit duke publikuar momente nga nisja e protestës për të treguar se janë të paktë në numër.
Duke folur në Kuvend, ai deklaroi se nuk mund të vazhdojë të tallet, duke i thënë se përballë nuk ka Sali Berishën, por rininë shqiptare.
“Meqë kolegët nga të dyja palët shkuan në Strasburg për rezolutën, edhe pse disa shkuan të luanin letra, të pinin verë dhe të takoheshin me Fredi Belerin, kërkesa ime është që nuk mund të nënshkruajmë asnjë rezolutë me këtë mazhorancë, për sa kohë nuk merren parasysh kërkesat e protestuesve.
Taulant, kujdes, sepse përballë nuk ke më Saliun, por rininë shqiptare. Milord, po ju them se populli jam unë. Sot më shtypni, por kur akulli të kriset, gjithçka merr fund. Dridhuni, Milord!”, u shpreh Redi Muçi.
Ndërkohë Balla replikoi me të duke i thënë se nuk mund të flasë në emër të popullit, pasi sipas tij, ka shkuar në Kuvend për shkak të dorëheqjes së një deputeti tjetër.
“Nuk ke asnjë të drejtë as politike dhe as morale që të flasësh në emër të popullit. Sepse në këtë sallë në emër të popullit ka një shumicë të caktuar nga vota. Ndërkohë që ti je aksidentalisht në këtë sallë se ke ardhur për shkak të dorëheqjes së një deputeti tjetër. Pra ke ardhur hajdutshe.
Unë nuk tallem me protestën. Protesta kur nisi ishte diçka e bukur. Kur nisi në emër të disa kërkesave që lidhen për mjedisin, por e kam thënë dhe vazhdoj ta them, nuk e di se sa mirë i ndiqni statuset e mia të orës 7, tregon se si kur hyri Saliu, hyri Gonja, Qorri, apo ndonjë tjetër, flamengot fluturuan dhe ngelën sorra si puna jote dhe e këtij tjetrit, dhe e Gones.
Gone sqaro se si mund të shesë një njeri një apartament 151 metër katror për 15 mln euro. Por petat e byrekut po hapen, sic po hapen edhe historitë e përfshirjes së lloj lloj balte dhe llumi“, tha ai.
Discussion about this post