Britania e Madhe ka konfirmuar se është gati të përdorë forcat e saj për të ndaluar pushtimin e Ukrainës nga Rusia. Lajmin e ka bërë të ditur sot, sekretari britanik i Mbrojtjes, Ben Wallace, i cili u shpreh se kjo krizë është një test kyç për vendosmërinë e perëndimit që t`i vërë fre Vladimir Putin-it. Sakaq, ai tha se nuk përjashtohet fakti që situata të degradojë me rritjen e forcave ushtarake si në Luftën e Dytë Botërore.
“Ka një përpjekje ndërkombëtare për ta bindur Putin-in të mos i urdhërojë trupat e tij të mësyjnë Ukrainën. Kjo përpjekje përfshin gjithçka që nis nga lëvizjet diplomatike, ekonomike e kapacitete mbrojtjeje me qëllimin që të zmbrapset çdo agresion i mundshëm. Por nëse kjo nuk funksionon, ne trupat i kemi gati. Në skenarin më të keq, do të ketë një përplasje siç nuk është parë në Evropë që prej Luftës së Dytë”, u shpreh ministri, i cili e ka urdhëruar tashmë dërgimin e trupave shtesë në kufijtë që Polonia dhe Lituania ndajnë me Rusinë.
Por me sa duket SHBA-të nuk mendojnë të njëjtën gjë, pasi presidenti amerikan, Joe Biden, tha më herët se vendosja e trupave amerikane në terren në Ukrainë, me synimin për të penguar një sulm të mundshëm rus, nuk është një opsion që po shqyrtohet. E.H/gijotina.com/
Discussion about this post