Edhe pse kanë mbetur pak orë nga përzgjedhja e presidentit të ri, votimi për Bajram Begajn varet edhe një farë forme nga Ilir Meta. Kushtetuta përcakton që përpara se të votohet në Kuvend, Begajt i duhet të heqë dorë nga të gjitha funksionet e tij publike dhe për pasojë nga posti i shefit të Shtabit të Përgjithshëm të Forcave të Armatosura si edhe nga grada “gjeneral major”. Por, kjo dorëheqje duhet të miratohet nga presidenti aktual Ilir Meta.
Ndërsa sot në mbledhje janë hapur zëra se Meta mund të bëhet pengesë në këtë pikë, kreu i grupit parlamentar të PS-së, Taulant Balla ka deklaruar se Bajram Begaj do të depozitonte dorëheqjen e tij për t’u miratuar edhe nga presidenti aktual, Ilir Meta. Balla tha se në orët në vijim do të duhej edhe miratimi i dorëheqjes nga Meta dhe shtoi se besonte se kjo çështje nuk do të krijonte një tjetër ‘betejë’ me presidentin aktual. Ndërsa i ka bërë thirrje Metës të mos krijojë pengesa të kota.
“Në legjislacionin përkatës, parashikohet që ushtarakët duhet të japin dorëheqje para se të emërohen apo zgjidhen, unë besoj se kjo procedurë do të përfshijë në orët në vijim edhe presidentin aktual i cili duhet të bëjë lirimin nga detyra të Begajt. Por unë besoj se kjo nuk do jetë një betejë e radhës me presidentin aktual. Por gjithsesi me kryetarin e komisionit të Çështjeve ligjore kemi menduar edhe mënyrën e zgjidhjes nëse larg qoftë mund të na krijohet një ngërç me presidentin aktual”, u shpreh Balla. Por, gjithsesi Balla u shpreh se në rast të ndonjë ngërçi që mund të krijohet, ishte menduar edhe zgjidhja me kryetarin e komisionit të Çështjeve Ligjore.
Discussion about this post