Jeton Lajmi, agjenti i arrestuar si “ushtar” i Ervis Martinaj, do të mbetet sërish në burg. Ai doli në Gjykatën e Apelit kundër Korrupsionit dhe Krimit të Organizuar, ku kërkoi ndryshimin e masës së sigurisë, e cila dha masën “Arrest me burg”.
Ish-oficeri i operacionales, Jeton Lami ka kërkuar lirinë në gjykatën e Apelit, ndërkohë që vazhdon të mbetet mister fati i Ervis Martinajt, i cili rezulton i zhdukur që prej 9 gushtit.
Jeton Lami pak ditë më parë është transferuar nga burgu i Shën-Kollit në burgun 313 në Tiranë, nën masa të rrepta sigurie. Lami cilësohet si personi kyç për zbardhjen e hetimit që ka nisur për rrëmbimin me qëllim eliminimin fizik të Ervis Martinajt.
Sipas hetimeve, Lami shoqëroi Ervis Martinajn 2 ditë para zhdukjes së tij duke e transportuar nga Tirana në Durrës dhe anasjelltas. Por deri më tani 28-vjeçari nuk ka pranuar të flasë para efektivëve të policisë, edhe pse raportohet se ka zhvilluar 2 orë bisedë me Gledis Nanon. Jeton Lami me banim në Kamëz më herët kishte punuar edhe në komisariatin nr 2 në Tiranë para se të transferohej në sektorin e FAST, njësisë speciale për kapjen e personave në kërkim.
Discussion about this post