Kreu demokrat Sali Berisha tha mbrëmjen e sotme se nëse do të kishte pranuar ultimatumin për tu larguar nga politika, nuk do të gjendej në këtë situatë.
Por Berisha tha se kurrë nuk do të tërhiqej dhe kjo situatë e motivon më shumë.
“Shqiptarët dhe vetëm shqiptarët janë ata që duhet të përcaktojnë se kush duhet të jetë në Parlament dhe kush s’duhet të jetë. Vetëm një opozitë sovrane është e vërtetë në një vend. Një opozitë e nënshtruar nuk të çon në fitore.
Unë vazhdova deputet dhe vijoj të jem deputet, ndaj meje ka nisur një proces i mirëfilltë politik, por kemi arritur të kemi një opozitë të vërtetë të kontrolluar nga anëtarët e saj, dhe jo nga kundërshtarët e saj”, tha Berisha në emisionin “A Show” në Syri Tv.
Berisha po përballet me SPAK, i cili ka kërkuar në GJKKO masën e sigurisë “arrest shtëpie”, por duke e ndaluar të takojë persona që s’janë pjesë e familjes së tij, dhe të jetë nën mbikqyrje policore.
Berisha tha se rikthimi në krye të PD-së e gjeti në llogore, të gatshëm dhe të përgatitur. Ish-Kryeministri e cilësoi kërkesën e SPAK si një urdhër të Edi Ramës, i cili është i tmerruar nga Sali Berisha, pasi iu prish ëndrra për një Shqipëri pa opozitë.
“Edi Rama është i tmerruar duke ndërmarrë veprime tipike diktatoriale. Rama ia ka kaluar edhe Putinit, opozita vijon betejën e saj, është në mbrojtje të parimeve themelore, dhe kjo opozitë ka të drejtën të përdorë çdo rrugë për të çliruar shqiptarët nga diktatura e re”, tha Berisha.
Discussion about this post