Poliçani, është gjithashtu një nga fshatrat e Shqipërisë që është lënë në harresë nga pushteti vendor dhe lokal dhe që politika i viziton banorët vetëm në prag zgjedhjesh.
Burime për Gijotina.com mëson se 2 mijë banorë, nga këta fermerë e blegtorë, po shkojnë drejt falimentimit për shkak të mungesës së rrugës.
Aksi rrugor qe prek katër fshatrat Rrabiak, Lodhishten, Karkanjoz dhe Tomorr në bashkinë Poliçan është një aks totalisht i amortizuar prej vitesh. Rruga është e mbushur me gropa, dhe nuk është shtruar kurrë. Gjatësia e kësaj rruge që lidh aksin nacional Berat-Skrapar me katër fshatrat e sipërpërmendur është rreth 17 km. Në të katër fshatrat jetojnë rreth dy mijë banorë, të cilët e vuajnë çdo ditë mungesën e rrugës, duke penalizuar edhe në nxjerrjen në treg të produkteve të tyre bujqësore.
Banorët e këtyre fshatrave shprehen se rruga është në kushte shumë të këqija, pa kanale kulluese dhe e pakalueshme për automjetet e vogla.
“Kjo rrugë po bën 40 vjet që është ndërtuar, që në sistemin komunist dhe për 40 vite me radhë nuk është vënë dorë nga të dyja bashkitë për ta mirëmbajtur apo rikonstruktuar atë. Në zonën tonë të gjithë vijnë vetëm për votat por nuk duam t’i shohim më me sy”, shprehen banorët.
Fshatrat Tomorr, Karkanjoz, Lodhishte dhe Rabiak merren me prodhime bujqësore dhe bagëti, por fermerët dhe blegtorët e zonës prej vitesh janë duke falimentuar për shkak të mungesës së rrugës.
Discussion about this post