Muret e selisë së PS në Fier mbushen me “parrulla” kundër Ballës

“Taulant Balla thikë pas shpine PS” dhe “Fieri nuk është Elbasan”, janë dy parrulla të shkruara me bojë të zezë mbi murin e bardhë të selisë së Partisë Socialiste në Fier.

Kreu i Grupit të PS prej shtatorit të 2021, kur Edi Rama realizoi një rrokadë që do të mbahet mend për ndarjen e influencës brenda partisë, u emërua drejtues politik në qarkun Fier.

Kryeministri nuk mori aspak parasysh faktin se Balla doli në krye të listës si kandidati më i votuar në Elbasan, me 21591 vota. Rama rrëzoi pritshmëritë e Ballës për të “rrëmbyer” postin e Ministrit të Brendshëm, e madje e “zhveshi” edhe nga detyra e Sekretarit të Përgjithshëm të PS, duke ia besuar postin Damian Gjiknurit.

Sakaq, në Fier zëvendësimi i Gramoz Ruçit të tërhequr nga politika me Ballën duket se asnjëherë nuk ka ngjallur reagime pozitive te socialistët.

Duket se këtë e tregojnë më së miri edhe parrullat në mur, përkrah të cilave shënohet se janë shkruar nga socialistë të ndershëm.