Deputeti i Partisë Demokratike, Xhelal Mziu ka reaguar i revoltuar pas vendimit të Bordit të Transparencës për të ulur çmimin e naftës me vetëm 1 lekë, pavarësisht se në bursë çmimi i saj ka rënie në nivele rekord. Teksa e cilëson “Bord të Gjobvënies”, Mziu shprehet se sot çmimi i naftës duhet të ishte më pak se 190 lekë/litër dhe jo 220 lekë/litër.
Më tej, deputeti demokrat thekson se qeveria e rilindjes duhet të shkrijë urgjentisht Bordin Gjobvënës, i cili me çmimet që po vendos po falimenton biznesin, turizmin si dhe po varfëron në esktrem shqiptarët.
“Bordi i Gjobvënies ndaj qytetarëve” ose Bordi i Transparencës, vendosi sot çmimin e naftës 220 lekë/litër ose 30 lekë më shumë se duhet, referuar bursës!
Çmimi i naftës së papërpunua në bursa, treguesi Brent, ka rënë në 94 dollarë për fuçi, pra në nivelet e para luftës në Ukrainë! Brent arriti deri në 130 dollarë për fuçi, sot është 36 dollarë më pak, sipas përllogaritjes duhet të shitet më pak se 190 lekë/litër!
Shiko grafikun e treguesit Brent
“Bordi i Gjobvënies” ndaj qytetarëve vendosi sot çmimin në 220 lekë/litër, nga më pak se 190 lekë/litër që ishte në shkurt, përpara luftës në Ukrainë, kur bursa ishte sa sot!
Çmimi i naftës në Shqipëri është luhatur nga 2017 lekë/litër deri në 265 lekë/litër, madje dhe nafta që kishim stok u shit me dyfishin e kostos së saj! Qeveria e rilindjes ka krijuar një “Bord Gjobëvënse” që çmimin e rrit artificialisht mbi 30 lekë të reja për litër! Qeveria e rilindjes ka taksat më të larta në Rajon dhe në Europë, kemi çmimin më të shtrenjët në Botë dhe 60-80 lekë/litër më shtrenjët se vendet e Rajonit! Qeveria e rilindjes duhet urgjentisht të shkrij Bordin Gjobvënës që penalizon qytetarët me mbi 30 lekë/litër! Qeveria e rilindjes të ul taksën e qarkullimit (dyfishë) që është sot mbi karburantin! Çmimet e karburantit e kanë falimentuar Biznesin, e kanë rrënuar turizmin dhe e kanë varfëruar në ekstrem çdo familje shqiptare!”-shkruan deputeti Mziu.
Discussion about this post