Nallbati ironizon pas daljes nga SPAK: Erdha të sigurohem që Belinda Balluku të jetë e qetë

Deputeti i PD-së, Bledion Nallbati ka shkuar ditën e sotme në SPAK.

Në fjalën e tij para gazetarëve pasi doli nga Prokuroria e Posaçme, Nallbati u shpreh se u thirr si person në dijeni.

“U thirra për konfliktin e stisur në fushatë nga Niko Peleshi dhe çerrat e tij për të cënuar imazhin tim dhe procesin zgjedhor. U thirra si person në dijeni”, u shpreh ai.

Kujtojmë se Nallbati dhe vëllai i tij Alti Nallbati, i njohur si “Duçja”, janë përfshirë më maj në një konflikt me një drejtues kamioni.

Në deklarimet e dhëna në prokurori, deputeti së bashku me vëllanë janë shprehur se kamioni ka qenë me shpejtësi dhe mund t’i kishte goditur nga mbrapa.

Nallbati ironizoi Belinda Balluku, ku sipas tij, ishte paraqitur në SPAK për të inspektuar kushtet ku do të deklarohet zëvendëskryeministrja, që kjo e fundit të jetë e qetë.

“Jam Bledioni jo Belinda ajo vjen pas meje. Erdha të inspektoj kushtet që të sigurohem që Belinda do jetë e qetë të sqarojë para kolegëve të Erionit për të sqaruar çështjet e shumta që ka”, u shpreh me ironi ai.