Ka përfunduar takimi tjetër gjysmëfinal i Nations League, ai mes Spanjës dhe Italisë.
“Furi Roja” triumfoi 2-1, pas 90 minutave, të luajtura në De Grolsch Veste të Enshede.
Takimi nisi shumë mirë për djemtë e Luis De La Fuente, të cilët shënuan në minutën e 3’, me anë të Pino, falë dhe gafës në mbrojtje të juventinit Bonucci.
Pas asaj goditje të shpejtë, dukej se italianët nuk do ta rimerrnin veten, me Spanjën që pati disa mundësi për të dyfishuar rezultatin.
Megjithatë, me kalimin e minutave, ekipi i drejtuar nga tekniku Mancini filloi që të kërcënonte portën e mbrojtur nga Simon.
Në minutën e 11’, Italia barazoi rezultatin me anë të sulmuesit të Lazios, Ciro Immobile, i cili transformoi në gol një 11-metërsh.
“Të kaltrit” u fuqizuan shumë nga barazimi, duke kërkuar golin e avantazhit, të cilin, në minutën e 21’, u duk sikur e gjetën me anë të Fratezit por sistemi VAR e anuloi golin e tij, për shkak se ai u gjend në pozicion jashtë loje.
Në barazim 1-1, u mbyll pjesa e parë e takimit. Në 45 minutat e dyta, skuadrat u rikthyen në fushë me disa ndryshime, përsa i përket formacionit.
Në fraksionin e dytë, Spanja ishte më kërkuese, duke goditur më shumë portën e Donnarummës, me mbrojtjen italiane që rezistoi deri në minutën e 88’ kur një goditje e devijuar e Rodrit shkoi në këmbët e sulmuesit të Espanyol, Joselu, i cili e kishte të lehtë që të shtynte topin drejt rrjetës.
Me këtë fitore Spanja kualifikohet në finalen e Nations League, të cilën do ta luajë të dielën përballë Kroacisë.
Italia nga ana e saj, do të përballet me vendasit e Holandës, në play-off-in për vendin e tretë.
Discussion about this post