Mëngjesin e sotëm është ndarë nga jeta në moshën 77-vjeçare bass baritoni dhe artisti më i madh i Korçës, Petrika Rëmbeci.
Rëmbeci ka filluar aktivitetin si këngëtar pranë estradës profesioniste në Korçë, ku babai i tij i cili në atë konsiderohej edhe si mjeshtri i fizarmonikës, Abaz Hajro, e shtyu që në moshë të re të merrte pjesë në festivalet e Korçës.
Gjatë viteve 1968-1973 ka kryer studimet në Akademinë e Arteve pranë të madhit Ramiz Kovaçi, ku edhe është diplomuar për këngëtar bass-bariton. Në vitin 1974 emërohet solist pranë Teatrit të Operas dhe Baletit ku vazhdon profesionin e tij si këngëtar solist deri në daljen në pesion.
Gjatë karrierës në TOB ka realizuar me sukses dhjetëra role nga operat shqiptare dhe të huaja. Disponon një repertor të pasur koncertal në gjininë e këngës dhe repertorit operistik.
Për herë të parë, ai del me këngën e tij në festivalin e 15-të, e konpozuar nga i madhi Pjetër Gaci, e cila quhej “E bukura Shqipëri”. Menjëherë u bë hit i kohës, nga ku nisi dhe i gjithë rrugëtimi i tij drejtë famës.
Me gjelbërim të përhershëm në zë dhe tmerrësisht miqësor ai arriti të hedhë themelet e tij në pentagramin shqiptar.
