Partia Demokratike ka denoncuar sot qeverinë se ka qenë selektive ndaj bizneseve që mbështesin PD, duke i trajtuar si armiq. Në një dalje publike për mediat, Flamur Hoxha, Sekretar për Klimën e Biznesit, tha se shumë biznese po gjobiten nga ana e qeverisë, për shkak të bindjeve politike.
“Denoncimet e ardhura në Partinë Demokratike dëshmojnë për një fushatë selektive të qeverisë kundër bizneseve që u deklaruan në fushatën zgjedhore pro ndryshimit dhe dolën në krah të Partisë Demokratike. Sot, shumë prej këtyre bizneseve po trajtohen si armiq. Përmes gjobvënies në zyrat e bashkive dhe të tatimeve, po tentohet hakmarrja me presion, nënshtrim, ose falimentim e shumë bizneseve në Tiranë dhe disa prej qyteteve kryesore të vendit”.
Ndër të tjera, ai i bëri thirrje qeverisë të ndalojë praktikën që po ndjek me bizneset, ndërsa për këta të fundit tha se do të jetë në krah të çdo sipërmarrësi që punon për të rritur ekonominë.
“Partia Demokratike i bën thirrje qeverisë të ndalojë këtë praktike primitive. Bizneset duhen lënë të qetë të punojnë mes kaq shumë vështirësive që u ka krijuar keqqeverisja e Edi Ramës. U bëjmë thirrje bizneseve ta refuzojnë presionin nga kushdo qoftë ai! Partia Demokratike do të jetë në krah të çdo sipërmarrësi që punon për të rritur ekonominë. Gjobat politike janë të papranueshme! Ato rrënojnë biznesin dhe ekonominë e vendit.
Goditjet selektive, trajtimi i bizneseve si armiq dhe kundërshtarë politikë nuk e zgjidh hallin e Edi Ramës. Ai është kryeministri i një pakice të dalë nga një masakër zgjedhore, me një ekonomi në krizë, me fare pak investime të huaja dhe me besimin më të ulët historik nga bizneset”, tha Hoxha.
Sipas tij, Rama është kryeministri i një pakice të dalë nga një masakër zgjedhore me shumë pak investime të huaja.
