Kryeparlamentarja, Lindita Nikolla, ka reaguar për vrasjen e policit në Lezhë, duke i shprehur ngushëllime familjes dhe të afërmve të Saimir Hoxhës. Përmes një postimi në Facebook, ajo shkruan se ky rast duhet të sjellë reflektim dhe të ashpërsohet lufta kundër krimit të organizuar.
Nikolla thotë se nuk duhet humbur më kohë për të rritur drejtësinë në vend dhe t’i jepet fund pandëshkueshmërisë.
“Në këtë moment të trishtë, u shpreh ngushëllimet e mia familjes, miqve dhe kolegëve të Saimir Hoxhës. Vrasja në krye të detyrës e nënkomisarit Saimir Hoxha është një alarm për të gjithë. Policia e Shtetit humbi një oficer shembullor e të përkushtuar, dy fëmijët babain dhe familja njeriun e saj të dashur. Duhet të reflektojmë të gjithë, për ligje më të ashpra kundër krimit, për forcë më të madhe goditëse ndaj kriminelëve e trafikantëve, për gjykime të pamëshirshme për krimet që marrin jetë njerëzish.
T’i themi Ndal pandëshkueshmërise, papërgjegjshmërisë dhe korrupsionit në zbatimin e ligjeve apo kontrollin e zbatimit të tyre, të cilat i paguajmë me jetë njerëzish, për më tepër me jetë oficerësh dhe policësh të shtetit”, shkruan ajo.
Ngjarja që ndodhi sot në Lezhë ka tronditur të gjithë vendin, ku një efektiv policie i vra gjatë një aksioni për zbulimin e personave që kultivonin drogë.
