Ministria e Ekonomisë, Kulturës dhe Inovacionit ka njoftuar se homazhet në nder të ikonës së kinematografisë dhe teatrit shqiptar Margarita Xhepa, e cila është ndarë nga jeta në moshën 91-vjeçare, do të mbahen nesër.
“Pas komunikimeve me familjen e së ndjerës, aktores së madhe Margarita Xhepa, njofton se homazhet do të mbahen nesër më datë 4 prill në orën 10:00-13:00 në hollin e Teatrit Kombëtar të Operas dhe Baletit”, thuhet në njoftimin shpërndarë për mediat.
Aktorja u lind më 2 prill të vitit 1934, në qytetin e Lushnjës, prej ku nisi edhe hapat e parë drejt karrierës së saj.
Në jetën e saj, aktorja e cila është vlerësuar edhe me titullin “Nder i Kombit”, numëron 182 role, mes të cilave 32 në kinematografi dhe 150 në skenën e teatrit.
Në rolet e tjera nga dramaturgjia botërore spikasin Klea tek ‘Dhelpra dhe rrushtë’ (Figereido), Lena tek ‘Xhaxha Vanja’ (Çehov), Ledi Milford tek ‘Luiza Miler’, Zonja Berling tek ‘Vizita e inspektorit’ (Pristli), Zonja Lomen tek ‘Vdekja e një komisioneri’, Ana Andrejevna tek ‘Revizori’, Marsela tek ‘Qeni i kopshtarit’ , Mashenka tek ‘Mashenka’, Shejla tek ‘Morali i zonjës Dulska’, apo Dado tek ‘Elektra e Sofokliut’, nën drejtimin e regjisorit grek ‘Dhimitri Mavriqis’, në Teatrin Kombëtar të Greqisë në Athinë.
Veç roleve në teatër, ka realizuar edhe 32 role në kinematografi, duke punuar me shumicën e regjisorëve shqiptarë ku përmendim filmat: “Vitet e para” , “Gjurmët”, “Dimri i fundit”, “Tokë e përgjakur”, “Një djalë edhe një vajzë”, “Apasionata”, “Gjeneral gramafoni”, “Rrethi i kujtesës”, “Vitet e pritjes”, “Dora e ngrohtë”, “Gurët e shtëpisë sime”, “Pranvera s’erdhi vetëm”, “Koncert në vitin 1936”, “E diela e fundit” dhe “I dashur armik”.
Në vitin 1997, interpretoi në filmin grek “Mirupafshim”.
Në maj 2004 u rikthye në skenën e Teatrit Kombëtar, për të shkëlqyer në dramën “Streha e të harruarve”, një tjetër sukses në karrierën e saj 50-vjeçare.
Discussion about this post