Këmbanat në të gjitha kishat katolike në vend kanë rënë në mesditë për të lajmëruar besimtarët për ndarjen nga jeta të Papa Françeskut. Në orën 18:00 në Katedralen e Shën Palit në Tiranë u zhvillua një meshë dedikuar Papa Françeskut, e cila drejtohet nga Imzot Arjan Dodaj.
Gjithashtu, gjatë paradites në katedralen e Shën Palit janë zhvilluar ceremonitë e liturgjisë së pagëzimit për ata që kishin planifikuar ndërkohë që shumë turistë të huaj e kanë vizituar atë ku kanë mësuar edhe për ndarjen nga jeta të Papa Françeskut
Papa Françesku ka ndërruar jetë ditën e sotme në moshën 88-vjeçare. Papa, i cili ishte peshkop i Romës dhe kreu i Kishës Katolike, u bë Papë në vitin 2013 pasi paraardhësi i tij Benedikti XVI dha dorëheqjen. Vdekja e tij u njoftua nga kardinali Kevin Farrell në një deklaratë të lëshuar nga Vatikani. Vatikani njoftoi se Ati i Shenjtë ka ndërruar jetë mëngjesin e ditës së sotme.
Në deklaratën që u lexua nga kardinali Kevin Farrell thuhet se e gjithë jeta e Papës iu kushtua shërbimit të Zotit dhe Kishës së Tij. Më tej thuhet se Papa i mësoi të jetojnë vlerat e Ungjillit me besnikëri, guxim dhe dashuri universale, veçanërisht në favor të më të varfërve dhe më të margjinalizuarve.
Discussion about this post