Një delegacion i UEFA-s ka mbërritur prej disa ditësh në Tiranë ku në fokus kanë qenë dy tema shumë të rëndësishme për të ardhmen e futbollit shqiptar.
E para është për zgjedhjen e Presidentit të ri të FSHF-së, ku zgjedhjet do të mbahen më 2 mars dhe e dyta është në kuadër të organizimit të finales së UEFA Europa Conference League, që do të luhet në Tiranë më 25 maj.
Burime bëjnë me dije se mbrëmjen e sotme kreu i delegacionit që ishte i përbërë prej 3 personash do të takohet në kryeministri me kreun e qeverisë, zotin Edi Rama, për t’i paraqitur atij raportin.
UEFA ka qenë shumë e shqetësuar për zgjedhjet e 2 marsit që do të zhvillohen në vendin tonë për faktin se në këto zgjedhje është përfshirë edhe politika me në krye kryetarin e bashkisë së Tiranës, Erion Veliaj.
Veliajt para disa kohësh iu publikua një audio përgjim ku kërcënonte të pranishmit që duhej të votonin kandidatët që ai i kishte “zara” të tij, për të bërë të mundur edhe kapjen e FSHF-së, apo siç e tha edhe ai vetë “ishullin e fundit” që kjo qeveri nuk ka mundur që të vërë nën kthetrat e saj.
Në lidhje me këto ngjarje si dhe për tritolin që iu vendos Armando Dukës në shtëpi reagoi edhe kreu i UEFA, Ceferin, i cili pati edhe një vizitë në vendin tonë para pak ditësh.
Ashtu siç shprehet edhe në video Veliaj duke thënë se do ja nxinte jetën Dukës me Gjykatat dhe SPAK, ky kërcënim po merr edhe formë.
Ditën e sotme Gjykata e Tiranës ka marrë vendim të pezullojë tre akte të Federatës Shqiptare të Futbollit për zgjedhjet e 2 Marsit, duke u bazuar në një padi të Akademisë Luftëtari, pa dhënë detaje të mëtejshme.
Kjo mund të jetë bërë edhe për t’i dhënë një arsye Ramës për të justifikuar se këtë çështje ia ka lënë drejtësisë edhe pse po bën ndërhyrjen nëpërmjet Veliajt për të ‘kapur’ edhe futbollin.
VENDIMI I GJYKATËS së Tiranës i publikuar ditën e sotme
Ju informoj se kërkesa me nr. 274 Aki, e cila u gjykua nga gjyqtare znj. Fida Osmani me kërkues: Akademia Luftëtari dhe person të tretë: Federata Shqiptare e Futbollit, me objekt: marrjen e masës së sigurimit të padisë ka vendosur:
Pranimin e kërkesës së palës kërkuese.
Marrjen e masës së sigurimit të padisë duke vendosur:
1.Pezullimin e efekteve juridike të Vendimit nr. 1, datë 10.1.2022, të Komisionit të Verifikimit të FSHF-së, si dhe çdo veprimi apo akti tjetër të dalë në zbatim të këtij vendimi, për realizimin e mbledhjes së Asamblesë së Përgjithshme të Zakonshme Zgjedhore të FSHF-së të datës 02.03.2022, deri në zgjidhjen e konfliktit me një vendim të formës së prerë;
2.Pezullimin e efekteve juridike të Vendimit të datës 21.01.2022, të Komitetit Ekzekutiv të FSHF-së, si dhe të çdo veprimi apo akti tjetër të dalë në zbatim të këtij vendimi, për realizimin e mbledhjes së Asamblesë së Përgjithshme të Zakonshme Zgjedhore të FSHF-së të datës 02.03.2022, deri në zgjidhjen e konfliktit me një vendim të formës së prerë;
3.Pezullimin e veprimtarisë së Komisionit të Verifikimit të FSHF-së, në ushtrimin e kompetencave të tij statutore, për organizimin, mbikëqyrjen dhe drejtimin e Asamblesë së Përgjithshme të FSHF-së të datës 02.03.2022, deri në zgjidhjen e konfliktit me një vendim të formës së prerë.
Kundër këtij vendimi lejohet ankim i veçantë në Gjykatën e Apelit Tiranë brenda 5 ditëve nga e nesërmja e komunikimit të vendimit të arsyetuar. U shpall në Tiranë më datë 17.02.2022.
Por, menjëherë pas këtij vendimi, ende i pa dalë nga zyrat e gjykatës, u ndërmor një sulm publikimi në të gjitha mediat pranë Veliajt, sikur gjykata kishte pezulluar zgjedhjet në FSHF dhe që Veliaj kishte fituar për herë të dytë ndaj Dukës. Por e vërteta qëndron se një vendim mase sigurimi, nuk ka asnjë efekt nëse nuk merr formën e prerë. Një vendim të tillë e merr Gjykata e Apelit, ku FSHF duhet ta ankimojë brenda pesë ditësh. Pra e gjitha mbetet një lojë mediatike e kryebashkiakut Veliaj për të krijuar opinionin publik se ka fituar ndaj FSHF, kur në të vërtetë nuk ka fituar asgjë./Gijotina.com/
Discussion about this post