Mes protestave dhe manifestimeve kundër vaksinimit të detyrueshëm për të cilën qeveritë e disa shteteve kanë diskutuar për ta vendosur në fuqi, një ngjarje e rëndë në Drenas pritet të tensionojë situatën. Mësohet se një 23-vjeçare ka ndërruar jetë, por familjarët e saj thonë se vdekja ndodhi tri ditë pasi ka marrë dozën e parë të vaksinës kundër koronavirusit.
Familjarët e 23-vjeçares, Zarife Imeri, në rrjetet sociale kanë shpërndarë lajmin për vdekjen e saj, teksa thonë se ajo ka humbur jetën 48 orë pasi është vaksinuar.
Telegrafi ka kontaktuar me Qendrën e Mjekësisë Familjare në Drenas për të sqaruar informatat rreth arsyes se pse vajza nga Drenasi ka vdekur tri ditë pasi është vaksinuar dhe se a ka pasur paraprakisht ndonjë informatë shëndetësore për pacienten.
Drejtori i Qendrës Kryesore të Mjekësisë Familjare në Drenas, Ismet Bogiqi, ka konfirmuar se vajza është vaksinuar më datën 13 shtator, në procedurë të rregullt. “Vajza është vaksinuar me procedurë të rregullt, më 13 shtator, ka marrë dozën e parë të vaksinës Pfizer. Nuk ka pasur ndonjë problem gjatë vaksinimit, Mjekësia ligjore tash do të merret me rastin”, deklaroi ai. Lidhur me rastin, Telegrafi ka provuar të marrë edhe një përgjigje nga Ministria e Shëndetësisë dhe Instituti Kombëtar i Shëndetit Publik (IKSHPK), por që deri në këto momente nuk ka pranuar ndonjë përgjigje.
Në Kosovë është duke vazhduar të ketë numër të madh të personave të infektuar me COVID-19, por në të njëjtën kohë ka vazhduar edhe vaksinimi i qytetarëve pa ndonjë komplikim serioz të paraqitur nga institucionet shëndetësore dhe përgjegjëse. Prej fillimit të vaksinimit në të gjitha qytetet e Kosovës janë dhënë 1.089.615 doza të vaksinës, deri më sot 385.297 qytetarë janë vaksinuar me dozën e dytë. Në Kosovë janë duke u aplikuar dy lloje të vaksinës kundër COVID-19, Pfizer dhe AstraZeneca.
