Një nga personazhet më të njohur të sportit të volejbollit në Shqipëri, i cili kontribuoi shumë në këtë fushë, Gafur Dudaj ka ndërruar jetë në moshën 82-vjeçare.
Dudaj ka qenë president për Teutën dhe Barlej Voleji, duke i rritur shumë këto klube, ndërsa gjithmonë do të mbahet mend për dedikimin ndaj këtij sporti.
Lajmin e ndarjes nga jeta e dha Federata Shqiptare e Volejbollit në një postim në rrjetet sociale, ku ndër të tjera i shpreh ngushëllim familjes.
“Ndarja nga jeta e tij është një humbje e madhe për sportin shqiptar në përgjithësi dhe volejbollin shqiptar në veçantin dhe Federata Shqiptare e Volejbollit i përcjell familjes së tij, por edhe familjes së madhe të sportit tonë, ngushëllimet më të sinqerta.”-shkruan FSHV.
Për këtë humbje ka reaguar edhe kreu i Federatës Shqiptare të Futbollit, Armand Duka, i cili përmes një reagimi në rrjetet sociale është shprehur i prekur, ndërsa ka vlerësuar kontributin e Dudajt në sportin shqiptar.
“U preka thellë nga lajmi i humbjes së Gafurr Dudajt, një dashamirës sporti dhe një mik i vjetër. Ai ishte një adhurues dhe mbështetës i madh, i sportistëve dhe iniciativave të tyre. Madje në kohët më të vështira të tyre, në fillimin e viteve ‘90. Ai ishte një njeri i mrekullueshëm, që gjithmonë rrezatonte energji pozitive, tek të gjithë ata që e njihnin dhe i lidhte puna me të.”-shkruan Armand Duka./K.T/Gijotina.com
