Ka ndërruar jetë mbrëmjen e sotme në Spitalin e Traumës në Tiranë, kryekamarieri i “Fish City”, Gazment Kurmaku, i cili ndodhej në vdekje klinike.
Ai punonte në kompleksin “Gjergj Luca” në zonën e Labinotit. Luca është biznesmen i cili njihet për lidhjet e tij me eksponent të politikës.
Kolegët e tij të restorantit me anë të një mesazhi në rrjetet sociale i shprehin ngushëllime familjes së tij, teksa shprehen se do u mungojë buzëqeshja, zëri dhe njerëzorja e tij.
“Ka dorëzuar shpirtin në prehjen e përjetësisë, Gazment Kurmaku, një nga punonjësit tanë, një nga njerëzit e përkushtuar. Pas një aksidenti fatal dhe një beteje disaditore ai nuk ka mundur t’ia dalë, nuk ka mundur të mbetet sërish me ne, për të ndërtuar ëndrrën e përbashkët.”
“Lamtumirë miku ynë!”
“Gaz tu prehtë shpirti të paqe!”- janë disa nga mesazhet e kolegëve në rrjetet sociale.
Si nisi ngjarja:
Pesë ditë më parë, në datë 2 Tetor Gazment Kurmaku, i cili është shef shërbimi në një kompleks në Labinot në dalje të Elbasanit në drejtim të qytetit të Librazhdit, u qëllua me grushte dhe sende të forta nga një klient, i cili nuk pranoi faktin që tavolinë ku ishte ulur ishte rezervuar.
Erjon Llapushi, kishte shkuar si klient në restorant, por 50-vjeçari që ishte në krye të detyrës si shef i kamarierëve e ka njoftuar se tavolina ku ishte ulur ishte e rezervuar.
Llapushi ka kundërshtuar dhe debati ka agravuar. Po sipas burimeve nga policia e Elbasanit, që rastin e ka njoftuar si sherr banal, Llapushi e ka goditur Gazment Kurmakun me grushte dhe sende të forta. 50-vjeçari ka rënë duke përplasur kokën me një pjesë betoni duke përfunduar në gjendje kome.
Ka qenë kompania e cila është përgjigjur pas interesimit për sherrin e ndodhur mbrëmjen e 3 tetorit në Elbasan, për një tavolinë të rezervuar, duke konfirmuar kështu vendin e ngjarjes.
Pas ndihmës së parë në spitalin e Elbasanit, 50-vjeçari u transportua në Tiranë ku nga raportimet e fundit u tha se ndodhej në vdekje klinike, e ndërsa tani, pavarësisht përpjekjes së mjekëve, mbrëmjen e sotme ai ndërroi jetë.
