Këtë të hënë në orën 13:45 Kukësi do të përballet në transfertë me skuadrën e Laçit në ndeshjen e vlefshme për javën e tretë të Abissnet Superiore.
Teksa ka folur në prag të kësaj sfide, trajneri i Verilindorëve Diego Longo është shprehur se bazuar në ecurinë e sezonit të kaluar nuk i sheh djemtë e tij si favoritë.
“Pas dy javësh nuk ekziston një kryesues. Ka vetëm favoritë dhe ne nuk jemi, sepse nuk mund të kalosh nga një kampionat në tjetrin, në dy muaj distancë dhe 21 pikë diferencë e të jesh favorit. Të tillë janë Vllaznia, Teuta, që luajnë dhe mirë e janë të organizuar. Partizani, Laci, që sigurisht është mbi ne, sepse vitin e kaluar fitoi 3 në 4 ndeshje me shumë pikë avantazh. Kështu që në do t’i marrim ndeshjet me radhë. Sigurisht Laçi është favorite. Një skuadër që ka shumë nga lojtarët e vitit të kaluar, ku bënë shumë më mirë se Kukësi. Kështu që janë ata favoritët. Janë nën presion, sepse kanë bërë 1 pikë në dy ndeshje e nëse nuk do të fitojë me ne, për ta do të ishte katastrofë.”- u shpreh ai.
Ndërsa më tej ka shtuar se pavarësisht mungesave prej dëmtimeve Kukësi ka 21 lojtarë të gjithë për teknikun që meritojnë të quhen titullarë.
“Fatkeqësisht ka edhe faktorë të tjerë, por nuk duhet të jenë alibi mungesat, dëmtimet. Kemi problem, por kam 21 lojtarë dhe për mua janë të gjithë titullarë. Mund të jetë rastësi që kanë luajtur të njëjtët, por do të ketë edhe ndryshime, të sforcuara në këtë rast, por kushdo të luajë do të bëjë të vetën dhe jam i qetë.”- vijoi Longo.
Më tej italiani shtoi se fitorja merret vetëm duke dhënë 100% nga vetja, pasi përballë kanë një kundërshtar shumë agresiv.
“Fitohet duke dhënë 100%, si gjithnjë, ndoshta edhe pak më shumë, duke qenë se është një skuadër shumë agresive, që është nën presion e do të japë edhe jetën që të fitojë. Natyrisht fitohet edhe me ekuilibër, me qetësi, me durim, duke shprehur lojën tonë e në fund të shohim”,-deklaroi trajneri.
Aktualisht Kukësi ndodhet në krye të tabelës së Superligës, pasi i ka fituar të dyja ndeshjet dhe ka mundur të grumbullojë gjashtë pikë./K.T/Gijotina.com
