Arrestimi i Julian Menadijes dëshmon më së miri “dështimin” e drejtësisë në vend. Ndërsa 42- vjeçari kërkohej nga Italia për trafik droge, ai endej i lirë dhe prej vitesh punonte si doganier në Portin e Durrësit. Me vendim të vonuar, togat e zeza kanë vendosur sot “arrest me burg” për trafikantin, i cili u arrestua disa ditë më parë për llogari të drejtësisë italiane. Ai ishte dënuar nga Gjykata e Apelit në Akuila me 7 vite e 6 muaj burg.
Nëse togat e zeza nuk do të “flinin” mbi këtë dosje, trafikanti tashmë me siguri do të ndodhej në burgjet italiane ku do të vuante dënimin për veprën penale “Trafikimi i lëndëve narkotike”, parashikuar nga Kodi Penal italian, por deri dje 42- vjeçari punonte i pashqetësuar si doganier në Portin e Durrësit.
Arrestimi i tij është bërë pikërisht në vendin e punës, në Port, duke dhuruar një shfaqjeje aspak të këndshme për punonjësit. Operacionin për kapjen e 42-vjeçarit në vendin e punës, policia e percolli nëpërmjet një njoftimi krejtësisht të thjeshtë, ku në asnjë rresht nuk shkruan se bëhet fjalë për një doganier të arrestuar, që prej disa kohësh ishte në kërkim nga autoritetet. 42-vjeçari kishte mbi 5 vite i punësuar dhe ka qenë në hetim nga Interpol dhe Policia, por së fundmi u ka ardhur njoftimi për ekstradimin. Mandija tashmë do të ekstradohet në Itali ku do të vuajë dënimin për veprën penale “Trafikimi i lëndëve narkotike” .
