Një 45-vjeçar është arrestuar në Durrës pas një ndjekjeje policore, gjatë së cilës ai përplasi automjetin e efektivëve ndërsa ishte nën efektin e lëndëve narkotike. Operacioni i koduar ‘Përfshirja e shumëfishtë’ çoi në pranga shtetasin Julian Ismailaj, i akuzuar për një sërë veprash penale, përfshirë shitjen e drogave të forta dhe vjedhje.
Gjithçka nisi pas një denoncimi për kanosje, ku policia ndërhyri për të verifikuar shtetasin E. H., 36 vjeç, nga Kavaja. Ai dyshohet se kishte kanosur një person me një pistoletë lodër, e cila iu gjet dhe iu sekuestrua. Për 36-vjeçarin ka nisur procedimi në gjendje të lirë.
Në shoqërinë e E. H. ndodhej edhe shtetasi J. I., 45 vjeç, banues në Durrës. Sapo pa policinë, ky i fundit u largua me shpejtësi me një automjet, duke nisur ndjekjen nga forcat e rendit. Gjatë tentativës për t’i shpëtuar policisë, 45-vjeçari përplasi mjetin e tyre, duke shkaktuar vetëm dëme materiale.
Pas ndalimit, gjatë kontrollit në automjetin e tij, shërbimet e policisë gjetën dhe sekuestruan sasi heroine dhe kokaine, si dhe një pajisje elektroshoku. Verifikimet zbuluan se J. I. po drejtonte mjetin nën efektin e narkotikëve.
Nga hetimet e mëtejshme, J. I. dyshohet se është gjithashtu autor i një vjedhjeje të ndodhur një ditë më parë. Në bashkëpunim me shtetasin V. K., 32 vjeç (i shpallur në kërkim), ai akuzohet se ka vjedhur bateri automjetesh dhe sasi nafte në një servis.
Policia ka shpallur në kërkim edhe shtetasin B. M., 51 vjeç, i cili i kishte dhënë me qira automjetin 45-vjeçarit dhe dyshohet si bashkëpunëtor në shitjen e lëndëve narkotike. Hetimet vijojnë nën drejtimin e Prokurorisë së Durrësit për zbardhjen e plotë të veprimtarisë kriminale të të arrestuarit dhe bashkëpunëtorëve të tij.
Discussion about this post