Besjan Xhixha është autori i vrasjes së vëllait të Talo Celës, Bujar Çela. Xhixha aktualisht ndodhet në burg për atentatin ndaj dy vëllezërve Haxhia në Durrës.
Vrasja e bujshme e vëllezërve Haxhia në Durrës një vit më parë, nxorri në dritë edhe dy emra të tjerë të përfshirë në eliminimin e tyre. Një operacion i koduar “Vazhdimi”, nën drejtimin e SPAK ka sjellë 17 qershor 2021 arrestimin në flagrancë të Enver Divës dhe Besian Xhixhës. Këta të fundit sipas njoftimit për shtyp nga policia dyshohet se kanë bashkëpunuar me grupin e porositësve për atentatin e dyfishtë. Roli i dy të arrestuarve në eliminimin e vëllezërve Haxhia ka qenë, sigurimi i mjeteve dhe krijimi i kushteve për realizimin e atentatit. Ndërsa tashmë pritet të përballen me akuzën për veprat penale “Sigurimi i kushteve dhe mjeteve materiale për të kryer vrasje” , kryer në bashkëpunim dhe “Mashtrimi”. Të arrestuarit për këtë ngjarje të rëndë dyshohet gjithashtu se janë pjesë e grupit të Talo Çelës dhe Nuredin Dumanit, dy të shumëkërkuarit për vrasjen e dyfishtë dhe një sërë vrasjesh të ndodhura në vend. Ndërsa 42-vjeçari Enver Dida, banues në Fushë-Mamurras prej disa vitesh ishte në kërkim pasi ishte arratisur nga burgu i Shën-Kollit ndërsa më herët ka qenë i përfshirë në armëmbajtje pa leje dhe grabitje argjendarie.
Ja si u realizua atentati
Zanafilla e vrasjes së dyfishtë të Haxhiajve ka qenë grabitja e Rinasit. Të shumëkërkuarit për këtë ngjarje të rëndë Nuredin Dumani dhe Talo Çela, kanë qenë miq, e paratë që morën nga grabitja në Rinas, ua lanë në ruajtje dy vëllezërve në Durrës. Sipas dëshmisë së bashkëpunëtorit të drejtësisë, dy shokët Talo e Dumani dyshuan se Haxhiajt u vodhën një pjesë të lekëve dhe urdhëruan vrasjen. Por nuk ka mbaruar me kaq. Edhe pas vrasjes së dy vëllezërve konflikti mes grupit është agravuar. Disa muaj më pas, më 16 shtator 2020 Talo Çelës në qytetin e Elbasanit i vritet vëllai Bujar Çela, e sipas prokurorisë i dyshuar për këtë krim është Nuredin Dumani, i identifikuar nga një kartëmonedhë teksa furnizoi automjetin me karburant 20 minuta para krimit. Talo e Dumani dikur shokë sot rezultojnë ndër personat më të kërkuar të drejtësisë dhe në një konflikt mes tyre që sipas SPAK e ka origjinën tek ndarja e parave të grabitura në Rinas më 9 prill të vitit 2019.
Vrasja e Bujar Çelës
Vëllai i Talos Çelës, të shumëkërkuarit nga policia, ka mbetur i vrarë në një atentat me armë zjarri mëngjesin e 17 shtatorit 2020. Ngjarja ka ndodhur rreth orës 05:45 në fshatin Bradashesh të Elbasanit përpara një lokali. 62-vjeçari Bujar Çela punonte si taksist pa licencë. Çela u qëllua me armë sapo zbriti nga makina për t’u ulur në një lokal. Ai u ndoq nga atentatorët, për të cilët asokohe u tha se ishin të paktën 2 persona të maskuar.
Discussion about this post