Jeraj Rodriges Rodriges vjen në Shqipëri, por jo në stërvitje. Edhe pse pritej dje në fushë, nuk ndodhi kështu. E megjithatë, këtë herë është i justifikuar.
Trajneri i ri i Apolonisë së Fierit është ftuar në një drekë mirëseardhjeje nga presidenti i klubit Koço Kokëdhima. Të paktën ky është varianti zyrtar që është dhënë për median sportive “Panorama Sport”. Pavarësisht mungesës së spanjollit, ekipi ka zhvilluar seancën e dytë stërvitore nën drejtimin e drejtorit Mariglen Kule. Mund të ndodhë që tekniku i ri të nisë nga puna, e megjithatë me garanci nuk mund të thuhet në këto momente…
Në klub i kanë marrë gjërat me nge dhe duhet të presin derisa të vijë dita që të prezantohet zyrtarisht trajneri Rodriges dhe përgatitësi Migel Gandia Monton. Sidoqoftë, dje ekipit i ishin shtuar dy elemente të rinj nga ekipi U19 i fierakëve. Mesfushori Xhoel Lutaj dhe portieri Henri Bega, iu bashkuan pjesës tjetër të grupit. Për momentin nuk kemi afrime “big”, por nuk përjashtohet ardhja e tyre në ditët e ardhshme.
Stërvitja shkoi sipas planit të përgatitur më parë. Fierakët nisën gjithçka nga palestra, aty ku u stërvitën për rreth 15 minuta. Më pas, zbritën njëri pas tjetrit në fushë dhe filluan me një nxehje të lehtë, afro 10 minuta. Më pas vijuan me disa ushtrime me topin në kuadrat të vogël e të gjerë, ku më së shumti u preferua saktësia dhe shpejtësia në pasime. Atmosfera ishte po e njëjtë, me lojtarët në harmoni të plotë me njëri-tjetrin, që nuk lënë pas as batutat./PanoramaSport
Discussion about this post