Nga Fitim Zekthi
Si shumë gjëra të tjera të cilat ne i ndotim, i zhvlerësojmë, i përdorim hipokrizisht duke i zhgërryer në mbrojtje të interesit të ulët personal, edhe me idetë konservatore, me pikëpamjet e djathta po ndodh e njëjta gjë. Një filozofi e djathtë, një qasje konservatore përbëhet, qëndron, jetohet, bartet dhe ka si hierarki logjike këta elementë: besimi, patriotizmi, vlerat, dlirësia në marrëdhëniet martesore dhe sigurisht ato seksuale, ligji dhe rendi.
Këto rrinë bashkë në mënyrë të natyrshme, burojnë nga e njëjta premisë dhe kanë kuptim vetëm në këtë hierarki dhe rend logjik. Qëndrimet për ekonominë, për shkollën, për shëndetësinë, për politikën, për zgjedhjen e presidentit, për organizimin e kuvendeve partiake, për marrëdhëniet me SHBA apo me PPE, për sistemin e votimit janë vetëm rrjedhoje logjike e këtij sistemi ideor.
Tek ne ateiste, njerëz që nuk tregojnë asnjë frikë apo veneracion për mësimet e Zotit, njerëz që nuk mbrojnë dlirësinë e marrëdhënieve martesore, njerëz që dashurinë për atdheun dhe kombin e kanë objekt propagande dhe janë pasuruar duke vjedhur tenderët e atdheut dhe kombit, njerëz që ligjin dhe rendin e kuptojnë ose si diktaturë ose si instrument të mbrojtjes së tyre apo ideologjive ultraliberale po flasin për konservatorizëm apo për djathtizëm. Është vërtetë tregues se në çfarë halli jemi.
Discussion about this post